عمرڪوٽ: اغوا ٿيل ٻه ڀينرون ڪراچي مان بازياب، هڪ جوابدار گرفتار

وومين پوليس عمرڪوٽ لالوکيت مان سدرا ۽ جويريا ڀٽي کي بازياب ڪرائي عمير ڀٽي کي گرفتار ڪري ورتو

عمرڪوٽ (رپورٽ:ڪانجي مل رکيسر) وومين پوليس عمرڪوٽ ڪراچي جي علائقي لالو کيت ۾ ڪارروائي ڪندي مبينا طور اغوا ٿيل ٻن ڀينرن، سدرا ڀٽي ۽ جويريا ڀٽي کي بازياب ڪرائي ورتو، جڏهن ته ڪيس ۾ نامزد هڪ جوابدار عمير ڀٽي کي گرفتار ڪيو ويو آهي، پوليس موجب ٻنهي ڀينرن جي اغوا جو ڪيس لڳ ڀڳ ڏهه ڏينهن اڳ سندن والد نصير ڀٽي جي فرياد تي وومين ٿاڻي ۾ داخل ڪيو ويو هو، ايف آءِ آر موجب ٻنهي نياڻين جي شادي 29 مارچ 2026ع تي طئي ٿيل هئي، جڏهن ته 24 مارچ تي هو بيوٽي پارلر ويون هيون، جتان سندن مبينا اغوا ٿيڻ جو الزام لڳايو ويو هو، پوليس جديد جاچ ۽ ڳجهي اطلاع تي ڪراچي جي علائقي لالو کيت ۾ ڇاپو هڻي ٻنهي ڀينرن کي بازياب ڪرائي ورتو ۽ ڪيس ۾ نامزد جوابدار عمير ڀٽي کي گرفتار ڪري ورتو، بازيابي کانپوءِ ٻنهي ڀينرن کي عدالت ۾ پيش ڪيو ويو، جتي عدالت سندن تحفظ ۽ وڌيڪَ قانوني ڪارروائي لاءِ ٻن ڏينهن جي مدي لاءِ سيف هائوس منتقل ڪرڻ جو حڪم جاري ڪيو، ٻئي طرف عدالت گرفتار جوابدار عمير ڀٽي کي ٻن ڏينهن جي جسماني ريمانڊ تي پوليس حوالي ڪري ڇڏيو آهي ته جيئن واقعي بابت وڌيڪَ جاچ مڪمل ڪري سگهجي، پوليس موجب ڪيس ۾ نامزد ٻين جوابدارن رفيق ڀٽي ۽ تنجيل ڀٽي جي گرفتاري لاءِ ڪارروايون جاري آهن ۽ کين جلد قانون جي ڪٽهڙي ۾ آندو ويندو.