ميرواھ گورچاڻي ڀرسان مسافر ڪوچ جو 2موٽرسائيڪلن کي ٽڪر، پيءُ ڌيءَ سميت 4 ڄڻا فوت

ميرواھ گورچاڻي ڀرسان ميرپورخاص روڊ تي ڳوٺ چوڌري غلام محمد آرائين وٽ پيش آيل افسوسناڪ روڊ حادثي ۾ عورت ۽ معصوم ٻارڙن سميت فوتين جو انگ وڌي چار ٿي ويو، جڏهن ته چار ڄڻا زخمي پڻ ٿيا پوليس موجب فوتين ۾ ڪيلاش ولد رميش ڪولهي (عمر 5 مهينا)، شريمتي موجان زال والجي ڪولهي (28 سال)، راجو پٽ لالچند (2 سال) شامل آهن، جڏهن ته لالچند ولد پرتاب ڪولهي ميرپورخاص اسپتال منتقل دوران زخمن جا سور نه سهندي فوت ٿي ويو. حادثي ۾ زخمي ٿيندڙن ۾ راهول ولد لالچند (5 سال)، گجران زال رميش، والجي پٽ ڪانجي ڪولهي ۽ ڳوٺ چوڌري غلام محمد آرائين واسي محمد اعظم ولد عنايت آرائين شامل آهن، جن مان ڪجهه زخمين کي طبي امداد فراهم ڪئي پئي وڃي. اطلاعن موجب متاثر خاندان ڳوٺ مٺو ڍير فقير ڦلهڏيون جا رهواسي هئا ۽ ڊگهڙي ڀرسان مائٽن وٽ شادي جي تقريب ۾ شرڪت لاءِ وڃي رهيا هئا ته رستي ۾ حادثي جو شڪار ٿي ويا. فوتين جي سڃاڻپ والجي ولد کيتو سول اسپتال ميرواھ گورچاڻي پهچي ڪئي. پوليس موجب حادثي ۾ ملوث مسافر اي سي ڪوچ کي تحويل ۾ وٺي ڊرائيور کي گرفتار ڪيو ويو آهي ۽ واقعي بابت وڌيڪ جاچ جاري آهي. ضروري قانوني ڪارروائي بعد فوتين جا مڙهه وارثن حوالي ڪيا پيا وڃن.