ملير: هاشم خاصخيلي ڳوٺ جي سيوريج لائين ۾ غيرقانوني ڪنيڪشن لڳائڻ خلاف احتجاج

برف ڪارخاني جي مالڪ رات جي اونداهي ۾ ڳوٺ جي سيوريج لائين ۾ غيرقانوني ڪنيڪشن لڳائي ڇڏيو

ملير (رپورٽ: عبدالرشيد مورجھريو)يوسي مراد ميمن جي علائقي هاشم خاصخيلي ڳوٺ جي رهواسين الزام هنيو آهي ته ميمڻ ڳوٺ سمال انڊسٽريل ايريا ۾ قائم برف جي ڪارخاني جي مالڪ رات جي اونداهي ۾ ڳوٺ جي سيوريج لائين ۾ غيرقانوني ڪنيڪشن لڳائي ڇڏيو.ڳوٺاڻن موجب جڏهن کين ان غيرقانوني ڪنيڪشن جي خبر پئي ته هنن فوري طور اها ڪڍي اڇلائي ڇڏي، جنهن بعد علائقي ۾ سخت ڪاوڙ ۽ بيچيني پکڙجي وئي آهي۔ رهواسين جو چوڻ آهي ته ميمڻ ڳوٺ سمال انڊسٽريل ايريا ڪمرشل علائقو آهي، اهو ڳوٺ واسين لاءِ عذاب بڻجي ويو آهي۔مقامي ماڻهن الزام هنيو ته انڊسٽريل ايريا ۾ قائم ڪارخانن طرفان ڳوٺ جي گيس، پيئڻ جي پاڻي ۽ سيوريج لائينن جو غيرقانوني استعمال ڪيو پيو وڃي، جيڪو قانوني طور ڏوهه آهي۔ هنن چيو ته رهواسين جي سهولتن ۽ وسيلن تي اهڙي قبضي کي ڪنهن به صورت ۾ قبول نه ڪيو ويندو۔ڳوٺاڻن جو چوڻ آهي ته ڪيترائي ڪمرشل ڪارخانا ڳوٺ جي گهرن جي بلڪل ويجهو تعمير ڪيا ويا آهن ۽ ڪجهه ته ڳوٺ جي زمين تي به ناجائز طور قائم آهن،جنهن سبب زمينن بابت تڪرار به پيدا ٿي ويا آهن۔رهواسين خدشو ظاهر ڪيو ته جيڪڏهن اختيارين فوري نوٽيس نه ورتو ته علائقي ۾ تڪرار وڌي سگهي ٿو ۽ ڪنهن به وقت جهيڙي يا خوني تصادم جو خطرو پيدا ٿي سگهي ٿو۔ڳوٺاڻن اعليٰ اختيارين کان مطالبو ڪيو آهي ته معاملي جو نوٽيس وٺي ڳوٺ جي سيوريج، گيس ۽ پاڻي جي غيرقانوني استعمال کي فوري طور روڪيو وڃي ۽ ذميوار ماڻهن خلاف قانوني ڪارروائي ڪئي وڃي۔