سجاول ۾ پاڪ نيوي پاران مستحقن ۾ راشن ورهائڻ جو سلسلو جاري
رمضان المبارڪ جي موقعي تي فلاحي سرگرمي تحت 300 مستحق خاندانن ۾ راشن ورهايو ويو
سجاول (ڊر) پاڪستان نيوي طرفان رمضان المبارڪ جي موقعي تي فلاحي سرگرمي تحت 300 مستحق ۽ نادار خاندانن ۾ راشن ورهايو ويو. راشن ۾ اٽو، چانور، دالون، کنڊ ۽ ٻيون ضروري گهريلو ڪتب جون شيون شامل هيون، جيڪي مستحق ماڻهن تائين پهچايون ويون.ان موقعي تي نيوي جي عملدارن چيو ته رمضان المبارڪ برڪتن، همدردي ۽ انسانيت جي خدمت جو مهينو آهي. هن بابرڪت مهيني ۾ضرورتمند ماڻهن جي مدد ڪرڻ نه رڳو سماجي ذميواري آهي پر هڪ اهم ديني ۽ انساني فرض پڻ آهي.هنن وڌيڪ چيو ته موجوده مشڪل معاشي حالتن ۾ گهٽ آمدني وارن خاندانن جي سهائتا ڪرڻ ۽ معاشري ۾ باهمي سهڪار، همدردي ۽ خدمت جي جذبي کي هٿي ڏيڻ هن مهم جو بنيادي مقصد آهي.راشن حاصل ڪندڙ مستحق خاندانن پاڪ بحريه جي هن قدم کي ساراهيندي چيو ته رمضان المبارڪ جي مقدس مهيني ۾ اهڙيون فلاحي سرگرميون غريب ۽ ضرورتمند ماڻهن لاءِ وڏي مدد ثابت ٿين ٿيون ۽ انهن جي گهرن ۾ خوشيون آڻين ٿيون.واضح رهي ته پاڪ بحريه طرفان وقت بوقت مختلف علائقن ۾ فلاحي ۽ امدادي سرگرميون جاري رکيون وڃن ٿيون، جن جو مقصد مقامي آبادي جي ڀلائي لاءِ پنهنجو ڪردار ادا ڪرڻ ۽ معاشري ۾ انسانيت، سهڪار ۽ خدمت جي جذبي کي فروغ ڏيڻ آهي۔
0 تبصرے