ملير: چشمه ڳوٺ جي مختلف اسڪولن جي شاگردن پاران جاڳرتا ريلي ڪڍي وئي

پڙهندي سنڌ ته وڌندي سنڌ ريلي ۾ وڏي انگ ۾ ٻارڙن، استادن ۽ سماجي اڳواڻن جي به شرڪت

ملير(رپورٽ: عبدالرشيد مورجھريو) "پڙهندڙ سنڌ، وڌندي سنڌ" جي عنوان هيٺ ريڙهي مياڻ جي چشمه ڳوٺ جي مختلف اسڪولن جي شاگردن پاران شعوري ريلي ڪڍي وئي، جنهن ۾ وڏي انگ ۾ ٻارڙن، استادن ۽ سماجي اڳواڻن شرڪت ڪئي۔ريلي ريڙهي مياڻ سيڪنڊري مان شروع ٿي ريڙهي مياڻ جي مختلف پاڙن ۽ مڇي مارڪيٽ کان ٿيندي مين اسٽاپ تائين پهتي، جتي شاگردن تعليم جي اهميت بابت بينر ۽ پلي ڪارڊ کڻي شرڪت ڪئي۔ شاگردن پاران "پڙهندڙ سنڌ، وڌندي سنڌ"، "تعليم هر ٻار جو حق آهي" ۽ "تعليم سان ترقي ممڪن آهي" جهڙا نعرا پڻ هنيا ويا۔ ريلي جي اڳواڻي ڊي او ملير سيڪنڊري اسڪول مير حسن لاشاري، اسسٽنٽ ڊي او امتياز نائچ، آر ايس يو رضا بلوچ، سماجي اڳواڻ يونس خاصخيلي،نذير احمد جت، محمد امين ڪلمتي، جاويد خاصخيلي ۽ ٻين اڳواڻن ڪئي۔ اڳواڻن ان موقعي تي خطاب ڪندي چيو ته تعليم قومن جي ترقي جو بنيادي ذريعو آهي ۽ هر ٻار کي تعليم جي سهولت فراهم ڪرڻ وقت جي اهم ضرورت آهي۔هنن چيو ته ريڙهي مياڻ جهڙن سامونڊي علائقن ۾ تعليمي سهولتن جي کوٽ آهي، جنهن کي ختم ڪرڻ لاءِ گڏيل ڪوششن جي ضرورت آهي۔ اڳواڻن والدين تي زور ڏنو ته هو پنهنجي ٻارن کي اسڪول موڪلين ته جيئن پڙهندڙ سنڌ سان گڏ ترقي يافته سنڌ جو خواب ساڀيان ٿي سگهي۔ريلي ۾ شرڪت ڪندڙن حڪومت کان مطالبو ڪيو ته سامونڊي پٽي جي علائقن ۾ وڌيڪ اسڪول قائم ڪيا وڃن، استادن جي کوٽ پوري ڪئي وڃي ۽ ٻارن کي بنيادي تعليمي سهولتون فراهم ڪيون وڃن۔