ڊي سي سرمد علي ڀاڳت جي صدارت هيٺ ونڊ پاور پروجيڪٽس بابت اجلاس

لاڳاپيل فنڊز جي مؤثر استعمال، سيڪيورٽي انتظامن ۽ ٻين مسئلن بابت جائزو ورتو ويو

ٺٽو (شفيق ڀٽي)ڊپٽي ڪمشنر سرمد علي ڀاگت جي صدارت هيٺ ونڊ پاور پروجيڪٽس سان لاڳاپيل فنڊز جي مؤثر استعمال ، سيڪيورٽي انتظامن ۽ ٻين پيش ايندڙ مسئلن جو جائزو وٺڻ لاءِ هڪ اهم اجلاس دربار هال مڪلي ۾ منعقد ٿيو۔ اجلاس ۾ لاڳاپيل کاتن جي آفيسرن، توانائي شعبي جي نمائندن ۽ ضلعي انتظاميا جي عملدارن شرڪت ڪئي۔ ڊپٽي ڪمشنر هدايت ڪئي ته ونڊ پاور منصوبن لاءِ مختص ڪيل فنڊز کي شفاف ۽ مؤثر انداز ۾ استعمال ڪيو وڃي ته جيئن مقامي آبادي کي وڌ کان وڌ فائدو ملي سگهي۔اجلاس ۾ ڪمپنين جي سيڪيورٽي معاملن تي پڻ غور ڪيو ويو ۽ ان حوالي سان لاڳاپيل ادارن کي ضروري قدم کڻڻ جي هدايت پڻ ڪئي وئي۔ڊپٽي ڪمشنر چيو ته سيڙپڪاري جي تحفظ لاءِ فول پروف سيڪيورٽي انتهائي ضروري آهي۔ڊپٽي ڪمشنر وڌيڪ چيو ته فنڊز جي استعمال جي نگراني لاءِ هڪ خاص ڪميٽي پڻ جوڙي وئي آهي، جيڪا باقاعدي رپورٽ پيش ڪندي ۽ ان ڳالهه کي يقيني بڻائيندي ته سمورا فنڊز قاعدن ۽ ضابطن موجب خرچ ٿي رهيا آهن۔ان موقعي تي سماجي بهتري جي قدمن تحت مستحق شاگردن لاءِ زيبسٽ ۾ اسڪالرشپس ڏيڻ جي تجويز تي پڻ اتفاق ڪيو ويو ته جيئن علائقي جي نوجوانن کي تعليمي موقعا فراهم ڪري سگهجن۔ڊپٽي ڪمشنر زور ڀريو ته مقامي ماڻهن کي روزگار ۾ ترجيح ڏني وڃي ۽ ترقياتي منصوبن جا فائدا سڌو سنئون عوام تائين پهچايا وڃن۔