قومي عوامي تحريڪ جو مرڪزي وفد عوامي نيشنل پارٽي جي باچا خان امن ڪانفرنس ۾ شريڪ

وفد جي اڳواڻي سينيئر ڊپٽي جنرل سيڪريٽري الطاف خاصخيلي ڪئي، خادم سمون، نذير بليدي ۽ ٻيا به شامل

حيدرآباد(بيورو) قومي عوامي تحريڪ جو مرڪزي وفد عوامي نيشنل پارٽي جي باچا خان امن ڪانفرنس ۾ شريڪ ٿيو. وفد جي اڳواڻي سينيئر ڊپٽي جنرل سيڪريٽري الطاف خاصخيلي ڪئي، وفد ۾ جوائنٽ سيڪريٽري خادم سمون، ضلعي صدر نذير بليدي، بابو ميمڻ ۽ معشوق چانڊيو شامل ھئا. عوامي نيشنل پارٽي جي مرڪزي صدر ايمل ولي خان ۽ ٻين اڳواڻن قومي عوامي تحريڪ جي وفد جي ڀرپور آجيان ڪئي. قومي عوامي تحريڪ جي سينيئر ڊپٽي جنرل سيڪريٽري الطاف خاصخيلي باچا خان امن ڪانفرنس کي خطاب ڪندي چيو تہ دھشتگردي ۽ ڪرپشن وڏا مسئلا آھن ۽ ھڪٻئي سان جڙيل آھن. حقيقي جمھوريت نه ھجڻ جي ڪري مسئلا آھن. مسلط ڪيل حڪمران واپاري آھن، حڪمرانن امن وڪڻي ڇڏيو آھي. قومن جا وسيلا وڪڻي ڇڏيا. درياھ وڪڻي ڇڏيو. پاڻي وڪڻي ڇڏيو. ٻيٽ وڪڻي ڇڏيا. بندرگاھ وڪڻي ڇڏيا آھن. اقتدار خريد ڪرڻ لاءِ سڀ ڪجھ وڪڻي رھيا آھن. امن جو نقطو حڪومت جي ايجنڊا ھجڻ گھرجي پر حڪومت جي ايجنڊا قومن جي وسيلن تي قبضو ڪرڻ ۽ وڪڻڻ آھي. عوام کي تقسيم ڪرڻ آھي. قومن ۾ ھڪٻئي خلاف نفرت پکيڙڻ آھي. الطاف خاصخيلي چيو تہ گل پلازه ۾ ھٿ سان باھ لڳائي ھاڻ صوبي ۽ ڪراچي کي وفاق حوالي ڪرڻ جا مطالبا ڪيا پيا وڃن. اھا حڪومت جي ايجنڊا آھي. جنھن سان پاڪستان وڌيڪ بحرانن جي باھ ۾ اچي ويندو. پاڪستان ھن وقت سياسي ۽ معاشي بحران جو شڪار آھي. عالمي سامراجي طاقتن جي نشاني تي آھي. پاڪستان کي قومي جمھوري برابري، حقيقي جمھوريت، حقيقي عدليه جي آزادي جي ضرورت آھي. پاڪستان کي ٻاھرين ڊڪٽيشن تي نہ خودمختيار پاليسين ذريعي ھلائي سگھجي ٿو.