ٺٽي ۾ جيئي سنڌ قومي محاذ پاران ريلي ۽ ڌرڻو

سول اسپتال ۾ مريضن کي ڪي به سهولتون نٿيون ڏنيون وڃن: اڳواڻ

ٺٽو( شفيق ڀٽي) جيئي سنڌ قومي محاذ ٺٽو جي طرفان سول اسپتال ٺٽو جا انتظام سنڀاليندڙ مرف اين جي او جي مبينا بدانتظامي، ڪرپشن ۽ عوام کي بھتر سهولتون فراهم نه ڪرڻ خلاف پبلڪ پارڪ مڪلي کان هڪ احتجاجي ريلي ڪڍي وئي۔ ريلي جي اڳواڻي ضلعي صدر غلام نبي کھٽي، مرڪزي اڳواڻ محسن انعام سيال، محمد علي شيخ ۽ مالڪ بروهي ڪئي۔ ريلي سول اسپتال مڪلي جي پارڪنگ واري هنڌ تي پهچي ڌرڻي ۾ تبديل ٿي وئي، جتي شرڪت ڪندڙن مرف خلاف سخت نعريبازي ڪئي۔ ڌرڻي کي خطاب ڪندي اڳواڻن چيو ته مرف جي انتظام هيٺ هلندڙ ٺٽو جي سڀني اسپتالن ۾ مريضن کي ڪو به رليف فراهم نه پيو ڪيو وڃي، ۽ “مفت علاج” جي دعوائن باوجود مختلف مدن ۾ ڳريون فيسون وصول ڪيون پيون وڃن۔ هنن چيو ته جڏهن صحت کاتو دعويٰ ڪري ٿو ته سرڪاري اسپتالن ۾ ڪا به فيس وصول نه ڪئي ويندي آهي، ته پوءِ سول اسپتال ٺٽو ۽ ٻين مرف جي ماتحت صحت مرڪزن ۾ مختلف طريقن سان مريضن کان رقم ڇو ورتي پئي وڃي؟ اڳواڻن الزام لڳايو ته الٽراسائونڊ، ايڪسري ۽ معمولي نوعيت جي ٽيسٽن لاءِ به مريضن کان پئسا وٺڻ معمول بڻجي چڪو آهي، جڏهن ته سول اسپتال کي ڪروڙين رپين جو بجيٽ جاري ڪيو وڃي ٿو۔ هنن چيو ته سرڪاري دوائن جا ڪنٽينر اچن ٿا پر اهي مريضن تائين نٿا پهچن، جيڪو مرف جي انتظامي نااهلي جو چٽو ثبوت آهي۔ جسقم ٺٽو جي اڳواڻن چيو ته اڄ جو احتجاج رڳو هڪ وارننگ آهي ته مرف فوري طور پنهنجا معاملا درست ڪري، بدانتظامي ختم ڪري ۽ مريضن کي علاج جون ضروري سهولتون فراهم ڪري۔ هنن خبردار ڪيو ته جيڪڏهن مطالبن تي سنجيده قدم نه کنيا ويا ته احتجاج جو دائرو وڌايو ويندو ۽ ساڳئي وقت قانوني ڪارروائي پڻ عمل ۾ آندي ويندي۔