ملير ۾ ڳوٺ ڌڻي پرتو موسيٰ واسي جو احتجاجي مظاهرو، مخالفن تي حملي ۽ ڌمڪين جا الزام

حاجي رستم لنڊ، جاويد ۽ معشوق نالي بااثر گهر تي قبضو ڪرڻ چاهين ٿا: شهزادو لنڊ

ملير (رپورٽ: عبدالرشيد مورجھريو) ملير جي علائقي ڌڻي پرتو موسيٰ ڳوٺ جي واسي شھزادو لنڊ بااثر ماڻهن جي مبينا ظلمن، گهر تي حملن ۽ قبضي جي ڪوششن خلاف عوامي پريس ڪلب ملير ۾ هنگامي پريس ڪانفرنس ڪندي چيو آهي ته علائقي جا بااثر ماڻهو زبردستي سندس گهر تي قبضو ڪرڻ چاهين ٿا، جنهن سبب هو ۽ سندس گهر ڀاتي سخت خوف ۽ عدم تحفظ جو شڪار آهن شھزادو لنڊ پريس ڪانفرنس دوران ٻڌايو ته هو گذريل 10 سالن کان ڌڻي پرتو موسيٰ ڳوٺ ۾ رهائش پذير آهي ۽ محنت مزدوري ڪري پنهنجي ٻچن لاءِ ننڍڙو اجھو تعمير ڪيو آهي جنھن تي مبينا طور حاجي رستم لنڊ، جاويد ۽ معشوق علي نالي بااثر ماڻهو ناجائز قبضو ڪرڻ جون ڪوششون ڪري رهيا آهن. هن الزام هنيو ته سندس غير موجودگي ۾ سندس ٻچن کي حراسان ڪيو ويو ۽ گهر تي ٽي ڀيرا حملا ڪيا ويا آھن جنهن سبب سندس خاندان ۾ سخت دهشت پکڙيل آهي هن چيو ته جڏهن هن پوليس عملدارن کي تحفظ لاءِ درخواستون ڏنيون تہ جوابدار وڌيڪ مڇرجي فون ڪالن ذريعي موتمار ڌمڪيون ڏيڻ لڳا آھن شھزادو لنڊ موجب مون قانون جو سهارو ورتو پر ان جي باوجود مون کي ۽ منهنجي خاندان کي ڌمڪيون ملي رهيون آهن، جنهن سان اسان جي جان کي شديد خطرو آهي شھزادو لنڊ خدشو ظاهر ڪيو ته جيڪڏهن فوري طور تي ڄاڻايل بااثرن خلاف قانوني ڪارروائي نه ڪئي وئي ته ڪنهن به وقت ڪو وڏو نقصان ٿي سگهي ٿو. هن الزام هنيو ته بااثر ماڻهو پنهنجي اثر رسوخ استعمال ڪري پوليس ۽ ٻين ادارن تي دٻاءُ وجهي رهيا آهن ته جيئن سندن خلاف ڪابه ڪارروائي نه ٿئي پريس ڪانفرنس جي آخر ۾ ھن آئي جي سنڌ، ڊي جي رينجرز، ڊي آءِ جي ايسٽ ۽ ايس ايس پي ملير کان اپيل ڪئي ته معاملي جو فوري نوٽيس ورتو وڃي، جوابدارن خلاف قانون موجب سخت ڪارروائي ڪئي وڃي ۽ کيس گهر ڀاتين سميت مڪمل تحفظ فراهم ڪيو وڃي تہ جيئن ھو پنھنجي زندگيءَ امن ۽ سڪون سان گذاري سگهن.