گلشن حديد ۾ سنڌي ادبي سنگت شاخ پپريءَ طرفان ثقافتي مشاعري جي عنوان هيٺ شاندار تقريب

قومي عوامي ۽ رومانوي شاعر سيد غفور شاھ تقوي، اصغر باغي ۽ بزرگ شاعر اقبال شاهين مهمان خاص طور شرڪت ڪئي

ملير (رپورٽ: عبدالرشيد مورجھريو) سنڌي ادبي سنگت شاخ پپريءَ طرفان گلشن حديد جي مقامي هوٽل ۾ ثقافتي مشاعرو جي عنوان هيٺ شاندار تقريب ڪوٺائي وئي، جنهن جي صدارت ساس ڪراچيءَ جي رابطہ سيڪريٽري نامياري شاعر راشد لکمير ڪئي ۽ قومي عوامي ۽ رومانوي شاعر سيد غفور شاھ تقوي، اصغر باغي ۽ بزرگ شاعر اقبال شاهين مهمان خاص طور شرڪت ڪئي،ان موقعي تي راشد لکمير صدارتي خطاب ڪندي چيو ته پپري شاخ سنڌ جي متحرڪ شاخن مان پڻ هڪ بهترين شاخ آهي جيڪا دستوري گڏجاڻيون پابندي سان ڪندي اچي پئي ۽ ان سان گڏ سٺا سٺا پروگرام ڪرائي پئي جنهنجو مثال اڄوڪو مشاعرو آهي، هن چيو ته شاعر، ليکڪ ئي قومن جي ترجماني ڪندا آهن ۽ ان ڏس ۾ سنڌ جي شاعرن پاڻ ملهايو آهي، هن قسم جي پروگرام مان نه صرف فنون لطیفہ سان سلهاڙيل پر جملي قوم کي اتساهه ملي ٿو اهڙا صحتمند پروگرام ٿيڻ گهرجن، سندس چوڻ هو ته شاخ جو سيڪريٽري اصغر عادل قريشي جس لهڻي جيڪو وڏي محنت سان علم ۽ ادب جي آبياري ڪري رهيو آهي، جڏهن ته سنڌ جي ناميارن شاعرن سجاد مهر، اسد مڱڻهار، وحيد محسن، شبيرنقوي، عاجز قادر سمون، سڪندر سرواڻ، مظهر پنهور، امداد لاشاري، مجيب سنڌي، اشرف ڪلهوڙو، عقاب مصطفاڇڄڙو، فيض جوڻيجو، ديدارگاڏهي، اياز سومرو، مختيار ڀنڊ، منير شيخ، عاجز اڪبر ڀٽي، عمران بشير، جمشيد زهراڻي، ساجن ڀنڊ، عنايت قريشي، شبير لاکو منظور عادل ۽ ٻين قومي ۽ عوامي شاعري ٻڌائي واهه واهه ڪرائي ڇڏي، پروگرام ۾ لوڪ راڳين شاهنواز پپن گل، سرفراز سومرو، اسد ڪنگو قومي ۽ صوفياڻا گيت جهونگاري محفل کي چار چنڊ لڳائي ڇڏيا، جڏهن ته پروگرام ۾ ڪهي آيل مهمان شاعرن ۽ اديبن کي سنڌ جي ثقافتي سوکڙي اجرڪن جا تحفا پڻ پيش ڪيا ويا.