ٺٽو، مڪلي ۽ ڀرپاسي وارن علائقن ۾ ڊمپر ۽ ٽرڪ حادثن ۾ اضافو

ٺٽو(شفيق ڀٽي) ٺٽو شھر، مڪلي۽ ڀرپاسي وارن علائقن ۾ ڳري ٽرئفڪ، خاص ڪري تيز رفتار ڊمپرن ۽ ٽرڪن سبب وڌندڙ حادثا عوام لاءِ مستقل خطرو بڻجي چڪا آهن. شهرين جو چوڻ آهي ته جيڪڏهن لاڳاپيل اختيارين طرفان ٽريفڪ بابت مستقل ۽ سنجيده اپاءَ وٺي ان تي ڪنٽرول نه آندو ويو ته عوام جي صبر جو پيمانو لبريز ٿي سگهي ٿو، جنهن جا نتيجا ڪنهن به وقت خطرناڪ صورت اختيار ڪري سگهن ٿا.شهرين ۽ سول سوسائٽي طرفان ايس ايس پي ٺٽو کان مطالبو ڪيو ويو آهي ته مڪلي بائي پاس، ٺٽو بائي پاس ۽ حيدرآباد بائي پاس تان ڳري ٽرئفڪ کي شهر کان ٻاهر منتقل ڪيو وڃي، جڏهن ته ڪيمرا سسٽم ۽ موجوده ٽريفڪ انتظامن جو نئين سر جائزو ورتو وڃي، ڇاڪاڻ ته موجوده نظام سان عوام کي تمام گھڻو جاني ۽ مالي نقصان برداشت ڪرڻو پوي پيو.واضح رهي ته ڪجهه ڏينهن اڳ مڪلي ۾ ٽرڪ جي حادثي ۾ ٻن نوجوانن جي فوت ٿيڻ کان پوءِ ٽريفڪ پوليس جي اهلڪارن خلاف لاپرواهي جي الزام هيٺ ڪارروائي جو مطالبو ڪيو ويو هو، جنهن بعد ڊي ايس پي ٺٽو کي انڪوائري آفيسر مقرر ڪري معاملي جي جانچ ڪرڻ لاءِ چيو ويو، پر افسوس جو اڃا تائين ان انڪوائري جو ڪو به نتيجو سامهون نه اچي سگهيو آهي، جنهن سبب عوام ۾ بيچيني وڌي وئي آهي. ان صورتحال خلاف اڄ ڪجهه شاگردن پڻ احتجاج رڪارڊ ڪرائيندي مطالبو ڪيو ته ڳري ٽرئفڪ تي مڪمل پابندي لاڳو ڪري انساني جانين جي تحفظ کي يقيني بڻايو وڃي.ٻئي پاسي، پوليس طرفان نمائشي ڪارروائي ڪندي پوليس اسٽيشن مڪلي جي ايس ايڇ او سب انسپيڪٽر الله وسايو نوهڙي پنهنجي عملي سان گڏ غلام الله چوڪ اين-3 پيٽرول پمپ ويجهو ڪارروائي ڪري ٻن ڊمپر ڊرائيورن، انور ولد حبيب الله پٺاڻ ۽ غفران ولد عبدالله پٺاڻ کي لاپرواهي سان گاڏي هلائڻ جي الزام هيٺ گرفتار ڪري پوليس اسٽيشن مڪلي تي مٿن ڪيس داخل ڪيو آهي، جنهن کي شهرين طرفان عارضي ۽ علامتي قدم قرار ڏنو پيو وڃي.شهرين جو چوڻ آهي ته جيستائين تائين ڳري ٽرئفڪ بابت مستقل پاليسي، بائي پاسن تي واضح انتظام، رفتار جي حدن تي سختي سان عمل ۽ ذميوار اهلڪارن خلاف نتيجه خيز ڪارروائي نه ڪئي ويندي، تيستائين اهڙيون نمائشي ڪارروائيون ڪو به لاڀ ڏئي نه سگھنديون.