ایران پر امریکی حملے کا امکان، پینٹاگون نے ٹرمپ کو تمام صورتحال سے آگاہ کر دیا

واشنگٹن (ویب ڈیسک) ایران پر ممکنہ امریکی حملے کے حوالے سے دفاعی ادارے پینٹاگون نے صدر ڈونلڈ ٹرمپ کو بریفنگ دے دی ہے۔ غیر ملکی خبر رساں ادارے کی رپورٹ کے مطابق امریکی محکمۂ دفاع کے دو عہدیداروں نے نام ظاہر نہ کرنے کی شرط پر بتایا ہے کہ ایران کے خلاف کسی بھی ممکنہ فوجی ردعمل میں فضائی طاقت اور طویل فاصلے تک مار کرنے والے میزائل مرکزی حیثیت رکھتے ہیں۔ رپورٹ کے مطابق اس کے ساتھ ساتھ پینٹاگون نے صدر ٹرمپ کو سائبر آپریشنز اور نفسیاتی مہمات کے آپشنز بھی پیش کیے ہیں، جن کا مقصد ایرانی کمانڈ کے ڈھانچے، رابطہ نظام اور سرکاری میڈیا کو متاثر کرنا ہے۔ امریکی عہدیداروں کے مطابق سائبر اور نفسیاتی آپریشنز کو روایتی فوجی طاقت کے ساتھ ملا کر ایک آپشن کے طور پر استعمال کیا جا سکتا ہے۔ دونوں امریکی عہدیداروں نے اس بات پر زور دیا ہے کہ جنگ کے حوالے سے تاحال کوئی حتمی فیصلہ نہیں ہوا اور سفارتی راستے اب بھی کھلے ہیں۔