جيئي سنڌ محاذ پاران سنڌ ۾ نوجوانن جي قتل خلاف رزاق آباد ۾ احتجاجي ريلي

ريلي جي اڳواڻي ضمير حاجاڻو، فيض هيسباڻي، خدا ڏنو شاهه، فريد بلوچ ۽ ٻيا ڪري رهيا هئا

ملير (رپورٽ: عبدالرشيد مورجھريو)سنڌ ۾ وڌندڙ بدامني ۽ نوجوانن جي قتل جي واقعن خلاف جيئي سنڌ محاذ (رياض چانڊيو) طرفان رزاق آباد جي مک چوڪ کان عوامي پريس ڪلب ملير تائين احتجاجي ريلي ڪڍي ويئي. ريلي جي اڳواڻي ضمير حاجاڻو، فيض هيسباڻي، خدا ڏنو شاهه، فريد بلوچ، حاجي صديق ڪلمتي، اقبال ڪلمتي ۽ وهاب گبول ڪري رهيا هئا، جڏهن ته ريلي ۾ ماڻهن جي وڏي انگ شرڪت ڪئي.ريلي ۾ شريڪ مظاهرين هٿن ۾ بينر ۽ پلي ڪارڊ کڻي سنڌ حڪومت ۽ قانون لاڳو ڪندڙ ادارن خلاف سخت نعريبازي ڪئي. ان موقعي تي مظاهرين ملير ۾ قتل ٿيل لطيف ڪلمتي، بدين ۾ ڪيلاش ڪولهي ۽ دادو ۾ قتل ٿيل نوجوان نادر جمالي جي قاتلن جي فوري گرفتاري جا مطالبا ڪندي اڀ ڏاريندڙ نعرا هنيا.احتجاجي ريلي مختلف رستن تان ٿيندي عوامي پريس ڪلب ملير پهتي، جتي مظاهرين ڌرڻو هنيو. ڌرڻي دوران اڳواڻن خطاب ڪندي چيو ته سنڌ ۾ نوجوانن جو قتل روز جو معمول بڻجي چڪو آهي، پر افسوس جو قاتل بي خوف گهمي رهيا آهن ۽ متاثر خاندانن کي انصاف نٿو ملي.اڳواڻن چيو ته سنڌ حڪومت مڪمل طور ناڪام ٿي چڪي آهي، جيڪا عوام کي جان ۽ مال جو تحفظ ڏيڻ ۾ ناڪام آهي. هنن الزام لڳايو ته پوليس ۽ انتظاميه بااثر ماڻهن جي آشيرواد هيٺ ڪم ڪري رهي آهي، جنهن سبب غريب ۽ بي وس نوجوانن جو رت سستو ٿي ويو آهي.خطاب ڪندڙ اڳواڻن وڌيڪ چيو ته جيڪڏهن لطيف ڪلمتي، ڪيلاش ڪولهي ۽ نادر جمالي جي قاتلن کي فوري طور گرفتار ڪري قانون جي ڪٽهڙي ۾ نه آندو ويو ته احتجاج جو دائرو وڌايو ويندو ۽ سنڌ جي ٻين شهرن ۾ به تحريڪ هلائي ويندي.ريلي ۽ ڌرڻي ۾ شريڪ ماڻهن سنڌ ۾ امن امان جي بحالي، قاتلن جي گرفتاري ۽ متاثر خاندانن کي انصاف فراهم ڪرڻ جو مطالبو ڪندي اعلان ڪيو ته جيستائين انصاف نٿو ملي، جدوجهد جاري رهندي