ڊي سي ٺٽو منور عباس سومرو جي صدارت ھيٺ پوليو مهم بابت اجلاس

اجلاس ۾ ايڊيشنل ڊپٽي ڪمشنر ون غلام دستگير شيخ، ڊي ايڇ او ڊاڪٽر صفدر حسين شاهه ۽ ٻيا به شريڪ

ٺٽو (ڊ ر) ڊپٽي ڪمشنر ٺٽو منور عباس سومرو جي صدارت ھيٺ 26 فيبروري کان شروع ٿيندڙ پوليو مهم جي تيارين جو جائزو وٺڻ بابت دربار هال مڪلي ۾ هڪ اهم اجلاس منعقد ٿيو، جنھن ۾ ايڊيشنل ڊپٽي ڪمشنر ون غلام دستگير شيخ، ڊي ايڇ او ڊاڪٽر صفدر حسين شاهه، صلعي جي سمورن اسسٽنٽ ڪمشنرن، ڊبليو ايڇ، يونيسيف، صحت، تعليم، لوڪل گورنمينٽ، مرف ۽ ٻين لاڳاپيل کاتن جي آفيسرن سميت مختلف اسٽيڪ هولڊرن شرڪت ڪئي. ان موقعي تي ڊپٽي ڪمشنر منور عباس سومرو سمورن اسٽيڪ ھولڊرن کي سختي سان ھدايت ڪئي تہ غلطين کي سُڌاريندي ايندڙ پوليو مھم دوران جنگي بنيادن تي قدم کنيا وڃن تہ جيئن ھن موذي مرض کي پاڙ کان پٽي ضلعي کي پوليو کان پاڪ بڻائي سگهجي. ھُن چيو تہ پوليو ٽيمن جي بھتر تربيت ۽ نگراني سميت انڪاري ٻارڙن تي وڌ ۾ وڌ ڌيان ڏنو وڃي ۽ ھڪ جٽادار حڪمت عملي تشڪيل ڏني وڃي ته جيئن ٽيمن جي گهر گهر موجودگي کي يقيني بڻائي ھر ٻار کي پوليو کان بچاءُ جو ڦڙا پياري سگهجن. ڊپٽي ڪمشنر چيو ته پوليو جهڙي موذي بيماري جي خاتمي لاءِ هر شهري ۽ ادارو پنهنجو ڪردار ادا ڪري. هن زور ڏنو ته ايندڙ پوليو مهم دوران پنجن سالن کان گهٽ عمر جو ڪوبه ٻار پوليو جا ڦڙا پيئڻ کان رهجي وڃڻ نہ گهرجي. ڊپٽي ڪمشنر هدايت ڪئي ته سمورا لاڳاپيل کاتا پاڻ ۾ رابطي کي وڌيڪ موثر بڻائين ته جيئن مهم دوران ڪو به ٻار پوليو جي ڦڙن کان محروم نه رهي. هن والدين، اُستادن ۽ سماجي اڳواڻن کي اپيل ڪئي ته هو پوليو مهم ۾ مڪمل سهڪار ڪن ۽ ٻارن جي مستقبل کي محفوظ بڻائڻ ۾ پنهنجو ڀرپور ڪردار ادا ڪن. ان کان اڳ اين اسٽاپ آفيسر ڊاڪٽر راجيش ڪُمار گذريل پوليو مھم جي ڪارڪردگي ۽ ايندڙ پوليو مھم جي تيارين بابت تفصيلي بريفنگ ڏيندي ٻڌايو ته پوري ضلعي ۾ پنجن سالن تائين عمر جي ھر ٻار کي پوليو جا ڦڙا پيارڻ لاءِ گشتي، فڪسڊ ۽ ٽرانزٽ ٽيمون مقرر ڪيون ويون آهن تہ جيئن سئو سيڪڙو ھدف حاصل ڪري مھم کي ڪامياب بڻائي سگهجي.