سنیل گروور کی عامر خان کی زبردست نقالی، کپل شرما شو میں سوشل میڈیا پر دھوم مچ گئی

کپل شرما شو میں اداکار اور کامیڈین سنیل گروور کی عامر خان کی شاندار نقالی نے سوشل میڈیا پر تہلکہ مچادیا ہے۔

کپل شرما شو میں اداکار اور کامیڈین سنیل گروور کی عامر خان کی شاندار نقالی نے سوشل میڈیا پر تہلکہ مچا دیا ہے۔ دی گریٹ انڈین کپل شو کا نیا سیزن ویسے ہی ناظرین میں بے حد مقبول ہو رہا ہے، تاہم سنیل گروور کی عامر خان کے انداز پر مبنی قسط خاص طور پر توجہ کا مرکز بن گئی ہے۔ سوشل میڈیا صارفین کی جانب سے اس پرفارمنس کو بے حد سراہا جا رہا ہے۔ اس سے قبل سنیل گروور کی سلمان خان، امیتابھ بچن اور معروف شاعر گلزار کی نقالیاں بھی وائرل ہو چکی ہیں، مگر عامر خان کی نقالی کو دیکھنے والوں نے غیر معمولی حد تک حقیقی قرار دیا ہے۔ اس قسط میں اداکار کارتک آریان اور اننیا پانڈے بطور مہمان شریک تھے، جبکہ سنیل گروور نے عامر خان کے لہجے، حرکات اور انداز کو اس مہارت سے پیش کیا کہ ناظرین حیران رہ گئے۔ ان کی پرفارمنس محض مزاح تک محدود نہیں رہی بلکہ اس میں باریک بینی اور فنکارانہ مہارت نمایاں دکھائی دی۔ ناقدین اور شائقین نے شو کے اس حصے کو بے حد پسند کیا، جس کے بعد سوشل میڈیا پر کپل شرما اور سنیل گروور میں بہترین کامیڈین کون ہے؟ کی بحث بھی شروع ہو گئی ہے۔ کئی صارفین نے سنیل گروور کو ’’حقیقی اے آئی‘‘ جیسے القابات دے دیے ہیں۔ ایک انٹرویو میں بالی ووڈ اسٹار عامر خان نے بھی سنیل گروور کی اس نقالی کو حقیقت کے انتہائی قریب قرار دیا۔ عامر خان کا کہنا تھا کہ یہ نقالی نہیں بلکہ ایک فن پارہ ہے، جسے دیکھ کر وہ اتنا ہنسے کہ سانس لینا مشکل ہو گیا۔ واضح رہے کہ سنیل گروور اور عامر خان 2008 میں ریلیز ہونے والی فلم گجنی میں بھی ایک ساتھ کام کر چکے ہیں۔