قومی مکالمے کیلئے حکومتی مذاکراتی کمیٹی کی تجویز، اعلیٰ قیادت کی مشاورت پر زور

نیشنل ڈائیلاگ کمیٹی نے صدر، وزیراعظم اور نواز شریف کی مشاورت سے حکومتی مذاکراتی کمیٹی تشکیل دینے کی سفارش کر دی۔

اسلام آباد میں نیشنل ڈائیلاگ کمیٹی کے اجلاس کے بعد جاری اعلامیے میں قومی سیاسی مکالمے کو آگے بڑھانے کے لیے اہم تجاویز پیش کی گئی ہیں۔ اجلاس میں اس بات پر زور دیا گیا کہ صدر مملکت آصف علی زرداری، وزیراعظم شہباز شریف اور مسلم لیگ (ن) کے قائد نواز شریف کی مشاورت سے ایک جامع حکومتی مذاکراتی کمیٹی تشکیل دی جائے، تاکہ سیاسی ڈیڈلاک کے حل کی جانب پیش رفت ممکن ہو سکے۔ اعلامیے میں یہ بھی تجویز دی گئی کہ اپوزیشن کی ایک نمائندہ کمیٹی قائم کی جائے جو سیاسی قیدیوں کی مشاورت سے ڈائیلاگ کمیٹی کے دائرہ کار کو وسعت دے۔ اس کے ساتھ ساتھ سینیٹ اور قومی اسمبلی میں فوری طور پر اپوزیشن لیڈر کی تعیناتی کا مطالبہ بھی کیا گیا۔ نیشنل ڈائیلاگ کمیٹی کے مطابق سیاسی کارکنوں کی رہائی سے حکومت پر عوامی اعتماد میں اضافہ ہوگا، جبکہ میڈیا پر عائد پابندیاں ختم کرنے اور سیاسی شخصیات کے خلاف درج مقدمات واپس لینے کی بھی سفارش کی گئی ہے۔ اجلاس میں اس امر پر اتفاق کیا گیا کہ قومی مکالمے کے عمل کو تسلسل کے ساتھ جاری رکھا جائے گا، جبکہ نیشنل ڈائیلاگ کمیٹی کا آئندہ اجلاس ملتان میں منعقد ہوگا۔ اسلام آباد میں منعقدہ قومی ڈائیلاگ میں سابق وزیراعظم شاہد خاقان عباسی، جماعت اسلامی کے لیاقت بلوچ، شیر افضل مروت، بیرسٹر سیف، عمران اسماعیل اور شہزاد وسیم نے شرکت کی۔ اعلامیے کے مطابق سابق وفاقی وزیر فواد چوہدری، عمران اسماعیل اور مولوی محمود بھی ڈائیلاگ کمیٹی کا حصہ ہیں۔