ٿرپارڪر ۾ سنڌي گيتن جي گونج ، پنهنجي ثقافت سان محبت جو ڀرپور اظھار

برائٽ فيوچر اسڪول ۾ ثقافتي ڏهاڙي جي حوالي سان تقريب منعقد ڪئي وئي، ٻارڙن پاران ٽيبلوز پيش

مٺي (رپورٽر) ٿرپارڪر ۾ سنڌي گيتن جي گونج ، پنهنجي ثقافت سان محبت جو ڀرپور اظھار ، برائٽ فيوچر اسڪول ۾ تقريب ، شاگردن جي پرفارمنس خبر موجب سنڌي ثقافت ۽ تهذيب سان محبت جي اظھار جي لاءِ ٿرپارڪر جي مختلف شھرن ۽ ڳوٺن ۾ ثقافتي تقريبون رکيون پيون وڃن مٺي جي نيو برائٽ فيوچر اسڪول ۾ شاندار ثقافتي رنگن سان ڀرپور تقريب رکي وئي جنهن ۾ اسڪول جي شاگردن ۽ شاگردياڻين قومي گيتن تي رقص ٽيبلوز پيش ڪيا ۽ تقريرن ۾ سنڌي ثقافت کي ڀيٽا پيش ڪئي. تقريب ۾ سياسي سماجي اڳواڻن والدين ۽ شھرين وڏي انگ ۾ شرڪت ڪئي. مهمانن پاران شاگردن جي بهترين پرفارمنس تي سندن واکاڻ ڪئي.انهي موقعي تي ڳالهائيندي استادن ۽ شاگردن چيو ته سنڌ ڌرتي دنيا جي قديم تهذيب يافته ڌرتين ۾ شمار ٿيندي آھي جنهن جي صديون پراڻي عظيم ثقافت تهذيب آھي جيڪا سموري دنيا ۾ الڳ سڃاڻپ رکي ٿي سنڌ جو ثقافتي ڏينهن پنهنجي ڌرتي ۽ انهي جي ثقافت سان محبت جي ورجاءُ جو ڏينهن آھي جنهن کي پوري جوش ۽ جذبي سان ملهايو ويندو.