یو بی جی اور بی ایم پی کا اتحادکاروباری برادری کی مضبوطی ثابت ہوگا، زبیر طفیل

حکومت کاروباری برادری سے حقیقی مشاورت کو ترجیح دے اور مسائل کو ترجیحی بنیادوں پر حل کرے،صدر یو بی جی

کراچی: صدریونائٹیڈ بزنس گروپ(یو بی جی) اور سابق صدر ایف پی سی سی آئی زبیرطفیل نے فیڈریشن چیمبر آف کامرس میں برسراقتدار یو بی جی اور اپوزیشن گروپ بزنس مین پینل کی قیادت کی جانب سے ملکی بزنس کمیونٹی کے بہتر مستقبل کیلئے مشترکہ جدوجہد کرنے کیلئے ایک ساتھ کوششیں کرنے کے عزم کو خوش آئند قرار دیتے ہوئے بی ایم جی اور بی ایم پی کے اتحاد کوپاکستانی کاروباری برادری کی مضبوطی تسلیم کیا ہے۔مرکزی ترجمان یو بی جی گلزارفیروز کے جاری کردہ اعلامیہ کے مطابق زبیرطفیل نے کہا کہ پاکستان بھر کی بزنس کمیونٹی جو اس وقت اپنے مسائل کیلئے پریشان ہے اور حکومت سے یہ امید لگائے بیٹھی ہے کہ حکومت ان کے مسائل کو فوری حل کرے،ان حالات میں کاروباری برادری یہ چاہتی تھی کہ انکی آواز ایک مضبوط پلیٹ فارم سے حکومت تک پہنچے جس کیلئے یونائیٹڈ بزنس گروپ اور بزنس مین پینل کی قیادت نے اپنے اس تاریخی اتحاد کا اعلان کیا۔زبیرطفیل نے کہا کہ دونوں گروپوں کا یہ اتحادملکی معیشت کو مضبوط بنانے کے لیے نہ صرف موثر ثابت ہوگا بلکہ الیکشن میں ہونے والے کروڑوں روپے کے اخراجات پر بھی قانو پانے میں مدد ملے گی۔صدر یو بی جی نے وزیراعظم میاں شہباز شریف اور انکی کابینہ پر زور دیا کہ وہ کاروباری برادری سے حقیقی مشاورت کو ترجیح دے اور انکے مسائل کو ترجیحی بنیادوں پر حل کرے۔زبیرطفیل نے یو بی جی اور بی ایم پی کے اتحاد پرسابق وفاقی وزیرِ تجارت ڈاکٹر گوہر اعجاز، یونائیٹڈ بزنس گروپ کے سرپرست اعلیٰ ایس ایم تنویر، بزنس مین پینل کے چیئرمین میاں انجم نثار اور دیگررہنماؤں کو مبارکباد پیش کی اور کہا کہ ہمیں فخر ہے کہ فیلڈ مارشل جنرل سیدعاصم منیر نے ملک کوناقابل تسخیر بنانے کے ساتھ ساتھ دفاعی اورمعاشی مضبوطی کیلئے اہم کردار ادا کررہے ہیں اور کاروباری برادری کے دونوں گروپوں کا اتحاد بھیملکی معیشت کو ترقی کی راہ پر گامزن کرے گا۔