وفاقی کابینہ کا بڑا فیصلہ: مسلح افواج کے ایکٹس میں ترامیم کی منظوری، فیلڈ مارشل کا عہدہ شامل

وفاقی کابینہ نے پاکستان آرمی، ایئر فورس اور نیوی ایکٹ میں ترامیم کی منظوری دے دی، جن کے تحت فیلڈ مارشل سمیت اعلیٰ عسکری عہدے شامل کر دیے گئے۔

وزیراعظم شہباز شریف کی زیر صدارت وفاقی کابینہ اجلاس میں اہم فیصلے کیے گئے۔ وزیراعظم نے وزراء کا 27ویں آئینی ترمیم کی منظوری پر شکریہ ادا کیا، جبکہ وزراء نے کھڑے ہو کر وزیراعظم کو مبارکباد دی۔ اعلامیے کے مطابق، وفاقی کابینہ نے پاکستان آرمی ایکٹ، پاکستان ایئر فورس ایکٹ اور پاکستان نیوی ایکٹ میں ترامیم کی منظوری دے دی۔ ان ترامیم کا مقصد افواجِ پاکستان سے متعلق قوانین کو 27ویں آئینی ترمیم کے مطابق ہم آہنگ کرنا ہے۔ ترمیم کے تحت چیئرمین جوائنٹ چیفس آف اسٹاف کمیٹی کا عہدہ موجودہ چیئرمین کی ریٹائرمنٹ کے بعد ختم کر دیا جائے گا۔ مزید برآں، قوانین میں فیلڈ مارشل، مارشل آف دی ایئر فورس، اور ایڈمرل آف دی فلیٹ کے عہدے باضابطہ طور پر شامل کر دیے گئے ہیں۔ کابینہ نے اس موقع پر فیڈرل کانسٹیٹیوشنل کورٹ (پروسیجر اینڈ پریکٹس) ایکٹ 2025 کے مسودے کی بھی منظوری دی، جبکہ ای سی سی کے 7 نومبر 2025 کے فیصلوں کی توثیق کی گئی۔