عوام جي حقن جو تحفظ ضلعي انتظاميا جي اهم ترين ترجيحن ۾ شامل آهي: غلام دستگير شيخ

ٺٽو( شفيق ڀٽي) ايڊيشنل ڊپٽي ڪمشنر ون غلام دستگير شيخ چيو آهي ته صارفين جي حقن جو تحفظ ضلعي انتظاميا جي اهم ترين ترجيحن ۾ شامل آهي، ڪنزيومر پروٽيڪشن ايڪٽ صارفين جي حقن جو محافظ آهي، جنهن جي آگاهي هر شهري تائين پهچائڻ لاءِ سمورن لاڳاپيل ادارن کي پنهنجو ڀرپور ڪردار ادا ڪرڻو پوندو، ان ڏس ۾ تعليمي ادارن سميت عوامي ھنڌن تي آگاهي مهم هلائي وڃي تہ جيئن ماڻهو غير معياري ۽ مهانگي شين بابت شڪايتون داخل ڪرائي سگهن. اھڙين ڳالهين جو اظهار هُن دربار هال مڪلي ۾ ضلعي ڪنزيومر پروٽيڪشن ڪائونسل جي اجلاس جي صدارت ڪندي ڪيو. اجلاس ۾ ايڊيشنل ڊپٽي ڪمشنر ٽو نبي بخش سولنگي سميت اسسٽنٽ ڪمشنرن، فوڊ، اطلاعات، پولٽري، لائيواسٽاڪ، اينيمل ھسبنڊري، فشريز، لوڪل گورنمينٽ، مارڪيٽ ڪميٽي، سوشل ويلفيئر، بيورو آف اسٽيٽڪس ۽ سپلائر، انڊسٽريز، چيمبر آف ڪامرس، فوڊ سيفٽي ۽ ٻين لاڳاپيل عملدارن ۽ واپاري اڳواڻن شرڪت ڪئي. ان موقعي تي ايڊيشنل ڊپٽي ڪمشنر ون غلام دستگير شيخ لاڳيپل عملدارن کي هدايت ڪئي ته عوامي سهولتن لاءِ دڪانن، ريڙهن ۽ پاٿارن تي ريٽ لسٽ نمايان ھنڌن تي لڳائڻ کي يقيني بڻايو وڃي جڏھن تہ ناجائز نفعي خورن، ناقص خدمتن جي فراھمي ۽ غير معياري شيون وڪرو ڪندڙن سميت ذخيرو اندوزن ۽ ملاوٽ مافيا خلاف سخت ڪارروائي ڪئي وڃي. هن لائيو اسٽاڪ ۽ لوڪل گورنمينٽ عملدارن کي پڻ هدايت ڪئي ته گوشت جي واپارين کي پابند بڻايو وڃي ته هو جانورن کي صرف ڊاڪٽرن جي تصديق کان پوءِ ذبح خانن ۾ ذبح ڪن تہ جيئن شهرين کي معياري ۽ صحتمند گوشت مھيا ٿي سگهي. هن اسسٽنٽ ڪمشنرن ۽ ٻين لاڳاپيل آفيسرن کي ھدايت ڪئي تہ ڪنزيومر پروٽيڪشن ايڪٽ تحت ڪارروايون شروع ڪن تہ جيئن عوام کي معیاري شيون ۽ بھتر خدمتون فراھم ٿي سگهن. ايڊيشنل ڊپٽي ڪمشنر عوام کي اپيل ڪئي ته هو پنهنجي حقن ۽ ذميوارين کان واقف ٿين ۽ غير معياري شين ۽ خدمتن جي خاتمي لاءِ ضلعي ڪنزيومر پروٽيڪشن ايڪٽ تحت ڪنزيومر ڪائونسل ۽ ڪنزيومر ڪورٽ سان رابطو ڪن- هن وڌيڪ چيو ته خوراڪ ۽ ٻين شين جي قيمتن تي نظرثاني کان پوءِ اسٽيڪ هولڊرز جي مشاورت سان قيمتن ۾ نمايان گهٽتائي آندي وئي آهي. دڪاندار ريٽ لسٽ موجب شيون وڪرو ڪن، ڇو ته عوام جو مفاد پهريون آهي. هن خبردار ڪيو ته جيڪو به واپاري غير معياري شيون وڪرو ڪندو يا گران فروشي ڪندو، ان خلاف سخت ڪارروائي ڪئي ويندي.