ملير: لڪي ٽيڪسٽائل مل ۾ مزدورن جي برطرفي خلاف احتجاج، ڇڪتاڻ ۾ 6 ڄڻا زخمي، ڪيس داخل

مزدورن جي برطرفي خلاف عوامي راج تحريڪ ۽ مزدورن پاران ڪارخاني آڏو ڌرڻو هنيو ويو، گارڊن ۽ مزدورن ۾ چڪريون

ملير (رپورٽ: عبدالرشيد مورجھريو) ملير جوگي موڙ تي قائم لڪي ٽيڪسٽائل ملز مان مزدورن جي برطرفي خلاف عوامي راج تحريڪ ۽ مزدورن پاران ڪارخاني آڏو احتجاجي ڌرڻو هنيو ويو.احتجاج دوران صورتحال ڇڪتاڻ واري ٿي وئي ۽ فئڪٽري گارڊن ۽ مزدورن وچ ۾ سخت جهيڙو ٿي پيو، جنهن سبب علائقو ميدانِ جنگ بڻجي ويو. جهيڙي ۾ 6 ڄڻا زخمي ٿيا.اطلاع ملڻ تي شاهه لطيف ٽائون ٿاڻي جي پوليس پهچي وئي ۽ صورتحال تي ضابطو آڻي احتجاج ڪندڙن کي منتشر ڪري ڇڏيو. بعد ۾ سيڪيورٽي انچارج جي فرياد تي سڪندر پتافي، امام داد سميت 25 ڄڻن خلاف ڪيس داخل ڪيو ويو.مزدور اڳواڻن جو چوڻ آهي ته فئڪٽري انتظاميا مزدورن تي ظلم ڪري رهي آهي ۽ جڏهن برطرفي خلاف پرامن احتجاج ڪيو ويو ته مظاهرين تي حملو ڪيو ويو. جڏهن ته انتظاميا جو مؤقف آهي ته احتجاج دوران مظاهرين فئڪٽري گارڊن تي تشدد ڪيو، جنهن سبب ڪيترائي سيڪيورٽي اهلڪار زخمي ٿيا.