ملير ايڪسپريس وي برسات جي سٽ نه سهي سگهيو، افتتاح جي ڪجهه ئي ڏينهن ۾ ٽٽي پيو

ڳري رقم سان ٺهيل ملير ايڪسپريس وي (شاهراهه ڀٽو) برسات جا پهريان ئي وسڪارا برداشت نه ڪري سگهيو

ملير (رپورٽ: عبدالرشيد مورجھريو) ڳري رقم سان ٺهيل ملير ايڪسپريس وي (شاهراهه ڀٽو) برسات جا پهريان ئي وسڪارا برداشت نه ڪري سگهيو افتتاح جي صرف ڪجهه ڏينهن گذرڻ بعد ئي روڊ هنڌان هنڌان ٽٽي خطرناڪ ڏار پئجي ويا آهن جنهن سبب سفر غير محفوظ بڻجي ويو آهي 39 ڪلو ميٽر ڊگهو هي منصوبو قيوم آباد لڳ ڄام صادق پل کان شروع ٿي ملير ندي جي ڪناري سان هلي ايم 9 موٽر وي تائين وڃي ٿو۔ ايڪسپريس وي جي تعمير لاءِ ابتدائي طور 24 ارب روپيا مختص ڪيا ويا هئا، پر بجيٽ وڌي 44 ارب روپين تائين پهتي هن رٿا کي پبلڪ پرائيويٽ پارٽنرشپ تحت تعمير ڪيو ويو، جڏهن ته ٻنهي ڪيريجي ويز جي ويڪر 36،36 فوٽ ۽ اوچائي 40 کان 50 فوٽ رکي وئي آهي۔شهرين هن اهم شاهراهه جي ٽٽڻ ۽ ڏار پوڻ تي افسوس ۽ حيرت جو اظهار ڪيو آهي۔ هن سلسلي ۾ اعتبار جيعن ذريعن انڪشاف ڪيو آهي ته ايڪسپريس وي جي ندي واري حصي ۾ حفاظتي پٿر نه رکڻ جي ڪري روڊ کي نقصان پهتو آهي ۽ جيڪڏهن حفاظتي ڪم نه ڪيو ويو ته وڌيڪ نقصان به ٿي سگهي ٿو ذريعن وڌيڪ ڄاڻ ڏني آهي ته هن مهانگي روڊ جو افتتاح سنڌ حڪومت جي تڪڙ سبب وقت کان اڳ ڪيو ويو، جنهن ڪري ڪم ۾ خلل پيدا ٿيو، جنهن بابت تعميراتي ڪمپنين کي آگاهه ڪيو ويو آهي۔ٻئي طرف شهرين احتجاج ڪندي مطالبو ڪيو آهي ته روڊ کي فوري طور تي مضبوط ۽ پائيدار بڻايو وڃي ته جيئن ڪنهن به وڏي حادثي کان بچي سگهجي