ڊسٽرڪٽ اليڪشن ڪمشنر ٺٽو پاران ووٽ جي اھميت ۽ فائدي بابت سيمينار منعقد

شاگردياڻين پاران ووٽ جي استعمال ۽ طريقہ ڪار بابت ٽيبلوز ۽ خاڪا پيش ڪيا ويا

ٺٽو( شفيق ڀٽي)ڊسٽرڪٽ اليڪشن ڪمشنر ٺٽو پاران ووٽ جي اھميت ۽ افاديت بابت آگاھي سيمينار منعقد ڪيو ويو- ڊسٽرڪٽ اليڪشن ڪمشنر ٺٽو پاران گورنمينٽ گرلز ھاءِ اسڪول گهارو ۾ ووٽ جي اھميت ۽ افاديت بابت سيمنار منعقد ڪيو ويو، جنھن ۾ ريجنل اليڪشن ڪمشنر ٺٽو محمد سجاد خٽڪ مھمان خصوصي طور شرڪت ڪئي. سيمينار کي خطاب ڪندي ريجنل اليڪشن ڪمشنر چيو تہ هر عورت جو ووٽ نه رڳو سندس آئيني حق پر هڪ مضبوط جمهوريت لاءِ تمام ضروري پڻ آهي. ھُن چيو تہ عورتون نہ فقط پاڻ ووٽ ڏيڻ لاءِ اڳتي اچن پر ٻين کي بہ ووٽنگ جي اهميت ۽ افاديت بابت آگاهي ڏين ته جيئن ايندڙ چونڊن ۾ عورتن جي شرڪت ۾ نمايان اضافو ٿي سگهي. ھن چيو تہ عام ووٽرن کي ووٽ جي اهميت ۽ افاديت بابت آگاهي ڏيڻ هر شهري جي ذميواري آهي. ان موقعي تي خطاب ڪندي ڊسٽرڪٽ اليڪشن ڪمشنر سيده حميرا بنت معاذ چيو تہ سيمينار جو مقصد عورتن کي چونڊ عمل جي اهميت ۽ جمهوريت ۾ انهن جي فعال شرڪت کان آگاهه ڪرڻ آھي. ھُن چيو تہ اليڪشن ڪميشن پاران نادرا جي سھڪار سان عورتن جا شناختي ڪارڊ ٺھرائڻ لاءِ پروگرام پن شروع ڪيو ويو آھي تہ جيئن وڌ ۾ وڌ عورتن جا ووٽ رجسٽرڊ ٿي سگهن. سيده حميرا بنت معاذ چيو تہ جيستائين صحيح ۽ حقيقي نمائندہ نہ چونڊبا تيستائين مُلڪ ترقي نہ ڪندو. ھُن چيو تہ گهر ويٺي ايس ايم ايس ذريعي ووٽ داخل ڪرائي سگهجي ٿو. سيمينار کي خطاب ڪندي اسسٽنٽ ڪمشنر ميرپور ساڪرو نبي بخش سولنگي چيو تہ عوام خاص طور تي عورتن ۾ ووٽ جي اھميت بابت شعور اجاگر ڪرڻ وقت جي اشد ضرورت آھي ته جيئن کين ووٽر طور رجسٽرڊ ڪرائي چونڊ عمل جهڙي قومي فرض ۾ شامل ڪري سگهجي. ھُن چيو تہ ٻارڙا تعليم ضرور حاصل ڪن تہ جيئن کين صحيح اُميدوار جي سُڃاڻپ ٿي سگهي. ان موقعي تي اسسٽنٽ ڊائريڪٽر نادرا عبدالستار سولنگي، ايڊيشنل ڊائريڪٽر سوشل ويلفيئر خدا بخش بھراڻي ۽ شاگردياڻين پاران ووٽ رجسٽريشن، ووٽنگ جي طريقيڪار ۽ شهري حقن توڙي ووٽ جي اھميت ۽ افاديت بابت تفصيلي روشني پڻ وڌي وئي، جڏھن تہ شاگردياڻين پاران ووٽ جي استعمال ۽ طريقہ ڪار بابت ٽيبلوز ۽ خاڪا پيش ڪيا ويا. آخر ۾ بھترين تقرير ۽ ٽيبلوز پيش ڪندڙ شاگردياڻين ۾ ڪيش انعام پڻ ورھايا ويا. ان موقعي تي ڊسٽرڪٽ انفارميشن آفيسر محفوظ علي سومرو، ھيڊ مسٽريس گرلز ھاءِ اسڪول گهارو نسرين پليجو، سينئر اسسٽنٽ نعمان احمد عيساڻي ۽ اُستادياڻين ۽ شاگردياڻين وڏي انگ ۾ شرڪت ڪئي.