افغان بستيءَ ۾ ٻئي ڏينهن به آپريشن، گهر ڊاهڻ دوران پٿرا۽ فائرنگ: 3 زخمي، 4 گرفتار

انتظاميه پاران گهر ڊاهڻ لاءِ ڪيل آپريشن دوران رهواسين ۽ پوليس ۾ چڪريون، 3 ڄڻا زخمي ٿي پيا

ملير (رپورٽ: عبدالرشيد مورجھريو) افغان بستيءَ تي شروع ڪيل آپريشن ٻئي ڏينهن به جاري رهيو جتي انتظاميا پاران گهر ڊاهڻ جي ڪوششن دوران پوليس ۽ ماڻهن ۾ سخت جهيڙن جا واقعا ٿيا. پٿرا، لوهي شيخون جو استعمال ۽ هوائي فائرنگ به ٿي جنهن جي نتيجي ۾ 3 ڄڻا زخمي ٿيا جڏهن ته 4 ڄڻن کي پ گرفتار ڪيو ويو انتظاميا جو چوڻ هو ته جڏھن انتظاميا گهر خالي ڪرائڻ ۽ ڊاهڻ جوجو عمل شروع ڪيو ته مقامي ماڻهن احتجاج ڪندي مزاحمت ڪئي ۽ رستا بند ڪرڻ جي ڪوشش ڪئي. ان دوران ماحول سخت تڪراري بڻجي ويو ان موقعي تي ماڻهن طرفان پٿرائو ڪرو ويو ۽ پوليس به ڪنٽرول لاءِ سخت ڪارروائي ڪئي. پوليس عملدارن جو چوڻ آهي ته زخمين کي اسپتال منتقل ڪيو ويو آهي ۽ گرفتار ٿيلن خلاف قانوني ڪارروائي شروع ڪئي وئي آهي ايس ايس پي اولھ طارق الاهي مستوئي ميڊيا سان ڳالهائيندي چيو هي سرڪاري زمين آهي، آپريشن ۾ ڪنهن به قسم جي رڪاوٽ برداشت نه ڪئي ويندي. خالي گهرن کي هر صورت ۾ ڊاهيو ويندو. جيڪي ماڻهو آپريشن ۾ رڪاوٽ وجهن ٿا تن خلاف سخت قانوني ڪارروائي ڪئي ويندي.ٻئي پاسي، مقامي رهواسين جو چوڻ آهي ته ڪيترائي افغان خاندان پنهنجا ڪچا گهر ۽ جھونپڙيون ڇڏي ويا آهن پر دعويٰ آهي ته اصل رڪاوٽ قبضا مافيا ۽ لينڊ گريبرز وجهي رهيا آهن، جيڪي هن زمين تي پنهنجا مفاد بچائڻ چاهين ٿا سماجي ڪارڪنن ۽ انساني حقن جي تنظيمن خبردار ڪيو آهي ته جبري بي دخلي ۽ بغير متبادل رهائش فراهم ڪرڻ متاثر خاندانن سان ناانصافي آهي، جيڪا انساني حقن جي ڀڃڪڙي آهي. انهن چيو ته حڪومت کي صرف آپريشن ۽ زمين خالي ڪرائڻ بدران شفاف پاليسي، سماجي بحالي ۽ بي گهر ٿيلن لاءِ مستقل بندوبست ڪرڻ گهرجي، ته جيئن شهر ۾ وڌيڪ بحران پيدا نه ٿئي۔