نوشهروفيروز ۾ سنڌ ايمپلائيز الائينس جي سڏ تي اسڪولن ۽ آفيسن جي تالابندي ۽ مظاهرا

مختلف اسڪولن توڙي آفيسن جي چوٿين ڏينهن به تالابندي ڪري ملازمن پاران احتجاج ڪيو ويو

نوشهرو فيروز(ڊ ر)سنڌ حڪومت پاران ريٽائر ملازمن جي پينشن ۾ کاٽ هڻڻ خلاف احتجاج شدت اختيار ڪري ويو آهي. نوشهرو فيروز جي سمورن کاتن ۾ هڙتال رهي. گورنمينٽ مدرسه ڪئمپس ھاءِ اسڪول نوشهرو فيروز ۾ گسٽا جي ضلعي صدر محمد پريل ڪاڪيپوٽو، محمد رمضان مڱڻيجو، زين العابدين راڄپر، جاويد احمد وسطڙو، جميل احمد خانزادو، الطاف حسين مري، راشد ميمڻ، عبدالغفور ميمڻ، سيد توصيف شاهه، مير حسن انڙ، عبدالقيوم ميمڻ، محمد ادريس ميمڻ، انيس احمد سومرو، عبدالسلام پيرزادو، سول اسپتال نوشهرو فيروز ۾ سعود احمد ٻوهيو، گورنمينٽ هاءِ اسڪول ڪلهوڙا اسٽيشن ۽ ٻين کاتن جي آفيسن ۽ اسڪولن ۾ چوٿين ڏينهن به هڙتال ڪري احتجاجي مظاهرا ۽ ڌرڻا لڳايا ويا. ان موقعي تي اڳواڻن ميڊيا سان ڳالهائيندي چيو ته حڪومت سنڌ ھڪ ملڪ ۾ ٻه قانون پئي هلائي جيڪي برداشت نه ڪنداسين. پينشن جي ڌاڙي خلاف اسان جو احتجاج جاري رھندو، جيڪڏھن حڪمرانن اسان جا سمورا جائز مطالبا، جنهن ۾ پينشن، پگهارون پنجاب صوبي جي برابر جيڪو چارٽر آف ڊيمانڊ ۾ مطالبا آھن تسليم نه ڪيا ته هيءُ احتجاج بلاول ھائوس ڪراچي طرف مارچ ڪندو جتي تاريخي ڌرڻو لڳندو