عمرڪوٽ ۾ به سنڌ ايمپلائيز الائينس جي سڏ تي اسڪولن ۽ آفيسن جي تالابندي ۽ مظاهرا

استادن تدريسي عمل جو مڪمل بائيڪاٽ ڪيو، اسڪول بند هجڻ ڪري ٻارڙا واپس گهرن ڏانهن روانا

عمرڪوٽ (رپورٽ:ڪانجي مل رکيسر) آل سنڌ ايمپلائز يونين ۽ سنڌ ايمپلائز الائنس جي اپيل تي عمرڪوٽ ۾ سرڪاري ملازمن اسڪولن ۽ آفيسن کي تالا هڻي سخت احتجاجي مظاهرو ڪيو، احتجاج ڪندڙ ملازمن ڊپٽي ڪمشنر عمرڪوٽ جي آفيس ٻاهران ڌرڻو هنيو ۽ حڪومت خلاف نعريبازي ڪئي، استادن تدريسي عمل جو مڪمل بائيڪاٽ ڪيو، جنهن سبب شاگرد مايوس ٿي گهر واپس موٽي ويا، ملازمن جو چوڻ هو ته حڪومت پينشن سڌارڻ جي بل وسيلي سرڪاري ملازمن کي بنيادي حقن کان محروم ڪرڻ چاهي ٿي، جيڪو سراسر ناانصافي آهي، رٽائرڊ ملازمن کي گروپ انشورنس جي رقم نه ڏيڻ ظلم آهي، مظاهرين مطالبو ڪيو ته مهانگائي کي نظر ۾ رکندي پگهار ۾ گهٽ ۾ گهٽ 70 سيڪڙو واڌ ڪئي وڃي ۽ پاليسي فوري واپس ورتي وڃي، ٻي صورت ۾ احتجاج جو دائرو وڌائي روڊن ۽ مک شاهراهن تائين پهچايو ويندو، ٻئي طرف 24 سيپٽمبر تي عمرڪوٽ ۾ ٿيندڙ ضمني بلدياتي چونڊن جون تياريون مڪمل ٿي ويون آهن، پر سرڪاري ملازمن احتجاجي حڪمت عملي تحت انهن چونڊن جو بائيڪاٽ جو اعلان ڪيو آهي، يوسي گپنو ۾ چيئرمين ۽ ضلعي ميمبر جي سيٽن لاءِ پنج ۽ اٺ اميدوار آمهون سامهون هوندا، جڏهن ته يوسي شاه مردان شاهه ۾ جنرل ڪونسلر جي هڪ سيٽ لاءِ ٻه اميدوارن وچ ۾ مقابلو ٿيندو، چيئرمين ۽ ضلعي ميمبر جي انتخاب لاءِ 12 هزار 822 رجسٽرڊ ووٽر ۽ جنرل ڪونسلر جي چونڊ لاءِ 3 هزار 310 ووٽر پنهنجو ووٽ ڪاسٽ ڪندا، ضلعي انتظاميه 12 پولنگ اسٽيشن قائم ڪيا آهن جن تي 92 عملو مقرر ڪيو ويو آهي، سيڪيورٽي جا سخت انتظام ڪيا ويا آهن ۽ تعليم کاتي چونڊ وارن علائقن ۾ عام موڪل جو اعلان ڪيو آهي، احتجاجي ڪيمپ ۾ مختلف کاتن جا ملازم وڏي تعداد ۾ شرڪت ڪري رهيا آهن ۽ اعلان ڪيو آهي ته جيستائين مطالبا منظور ناهن ٿيندا، احتجاج جاري رهندو.