جمھوريت جي نالي ۾ آمريت قائم آھي. ميوزڪ ٽيچرز ڪيترن ئي ڏينھن کان سراپا احتجاج آھن: اياز لطيف پليجو

اياز لطيف پليجي پاران ڪراچي ۾ ميوزڪ ٽيچرز تي پوليس تشدد ۽ گرفتارين جي مذمت

حيدرآباد(بيورو)قومي عوامي تحريڪ جي سربراھ اياز لطيف پليجي ڪراچي ۾ ميوزڪ ٽيچرز تي پوليس تشدد ۽ گرفتارين جي مذمت ڪندي چيو آھي تہ جمھوريت جي نالي ۾ آمريت قائم آھي. ميوزڪ ٽيچرز ڪيترن ئي ڏينھن کان سراپا احتجاج آھن، سنڌ حڪومت کي استادن سان ڳالھيون ڪري انھن کي آفر آرڊر ڏيڻ گھرجن ھا. ميوزڪ ٽيچرز دھشتگرد يا ڏوھاري ناھن. سنڌ حڪومت منشيات فروشن ۽ ڌاڙيلن خلاف ڪارروائي ڪرڻ لاء تيار ناھي، ھٿين خالي ميوزڪ ٽيچرز تي دشمن ٿي ڪڙڪي آھي. مھذب ملڪن ۾ احتجاج ڪندڙ ماڻھن سان ڳالھيون ڪيون وينديون آھن، انھن جا مسئلا حل ڪيا ويندا آھن. اياز لطيف پليجي چيو تہ پ پ حڪومت ٻڌائي تہ سنڌ ۾ آمريت آھي، بادشاھت يا جمھوريت آھي. جڏھن خود پ پ اقتدار کان ٻاھر ھوندي آھي تہ احتجاج قانوني، انساني ۽ جمھوري حق بنجي ويندو آھي ۽ اقتدار ۾ ايندي آھي تہ ميوزڪ ٽيچرز، ليڊي هيلٿ ورڪرز، پورھيتن ۽ سياسي سماجي ماڻھن لاءِ احتجاج ڪرڻ تي انھن جي زندگي جھنم بنائي ڇڏيندي آھي. اياز لطيف پليجي چيو تہ ميوزڪ ٽيچرز کي آفر آڊر ڏئي سندن جائز مطالبا منظور ڪيا وڃن. تشدد جي ذميوار پوليس آفيسرن خلاف ڪارروائي ڪئي وڃي. گرفتار استادن کي فوري طور آزاد ڪيو وڃي.