حيدرآباد ۾ يوسف لغاري جي ڪتاب عشق زنده آباد جي مهورت تقريب، اياز لطيف پليجو ۽ ٻيا شريڪ

علم، ادب، شاعري کان ثقافت کان سواءِ قومون کوکليون ھونديون آهن: اياز لطيف پليجو

حيدرآباد (بيورو)قومي عوامي تحريڪ جي سربراھ اياز لطيف پليجو سنڌ ميوزيم ۾ شاعر يوسف لغاري جي ڪتاب عشق زندھ باد ڪتاب جي مھورت واري تقريب ۾ مھمان خاص طور شرڪت ڪئي.ان موقعي تي خطاب ڪندي اياز لطيف پليجي چيو تہ علم، ادب، شاعري کان ثقافت کان سواءِ قومون کوکليون ھونديون آهن. سنڌ ۾ علم جي روشني ھجي، سياسي ادب، انقلابي شاعري مايوسي مان ڪڍي ٿي سنڌ جي نوجوانن کي شاھ عبداللطيف ڀٽائي،رسول بخش پليجو، جي ايم سيد، شيخ اياز، آريسر، رشيد ڀٽي، امرجليل، سراج ميمڻ، استاد بخاري،سرويچ سجاولي، ابراھيم منڇي، فيض احمد فيض، احمد فراز، نيشن منڊيلا، اردو ادب پڙهڻ گهرجي. سنڌي ماڻھو امن پسند، ترقي پسند، روشن خيال، علم دوست، انسان دوست، موسيقي ۽ رقص سان پيار ڪندڙ آھن. سنڌي ماڻهن کي مايوسي ۽ خيالي دنيا مان نڪري حقيقي سائنسي دنيا ۾ اچڻو پوندو. اياز لطيف پليجي چيو تہ خطرن جو مقابلو علم، تعليم، ڄاڻ، ٽيڪنالاجي ۽ سائنس سان ٿيندو. جيڪڏھن بدلجندڙ دنيا سان گڏ پاڻ کي تبديل نہ ڪيوسين، پاڻ علم ۽ ٽيڪنالاجي جو رستو نہ ورتو تہ ھي دنيا ڏاڍي ظالم اٿو۔ تبديلي چاھي پاڻ کي آسمان جي بلندين تي کڻي وڃي تبديلي چاھي تہ زمين تي ڌوڙ ڪري پيرن ۾ چٿي ڇڏي۔ سنڌيو پاڻ کي علم سان تبديل ڪيو. اياز لطيف پليجي چيو تہ سائنس دلربا آھي، سائنس محبوبہ آھي، سائنس سان دشمني نہ ڪجو.. جن سائنس سان دشمني ڪئي، اُھي تباھ ۽ برباد ٿي ويا. اياز لطيف پليجي چيو تہ مھانگا فون، ڪپڙا ۽ دعوتون ڪنھن بہ شخص جي لئي ۽ ان جو شو وڌائين ٿا. ڪتابن جو مطالعو، علم، عقل، سائنس، تعليم ۽ تحقيق ڪردار سازي ڪري ٿي. سفر ڪرڻ سان دماغ وسيع ٿين ٿا. شوبازي ۽ لئي عارضي آھي، علم، عقل ۽ تجربو جٽادار آھي.اياز لطيف پليجي چيو تہ سنڌ پبلڪ سروس ڪميشن کي ڪرپشن جي منڊي بنائي نوجوانن کان اميد کسي وئي آھي. ميرٽ جو قتل ڪري نوڪريون وڪرو ڪيون پيون وڃن. نوجوانن جو استحصال سنڌ جو استحصال آھي. نوجوان خاموش نہ ويھن. ميرٽ جي لتاڙ خلاف رستن تي اچن.