گهگهر ۾ ايڪشن ڪميٽي جو احتجاج، مغوي پورهيت جي بازيابي ۽ بنيادي سهولتن جو مطالبو

ملير (رپورٽ: عبدالرشيد مورجھريو) گهگهر ايڪشن ڪميٽي طرفان مغوي پورهيت اڪرم زهراڻي جي بازيابي ۽ علائقي ۾ گيس، بجلي ۽ پاڻي جي بندش خلاف وڏي احتجاجي ريلي ڪڍي وئي ريلي گهگهر جي مک چوڪ کان شروع ٿي قومي شاهراهه تائين پهتي جنهن ۾ رهواسين وڏي انگ ۾ شرڪت ڪئي ريلي جي اڳواڻي مولوي عبدالماجد چاچڙ، جان محمد جاني، فياض اتيرو، اعجاز سامتيو، شمشاد زهراڻي ۽ ٻين ڪئي. احتجاج ۾ شرڪت ڪندڙ ماڻهن جي هٿن ۾ بينر ۽ پلي ڪارڊ هئا ۽ هو نعرا هڻي رهيا هئا: گهگهر کي بنيادي سهولتون ڏيو، پورهيت اڪرم زهراڻي کي آزاد ڪرايو ان موقعي تي اڳواڻن خطاب ڪندي چيو ته گهگهر جا ماڻهو سخت مصيبتن کي منهن ڏئي رهيا آهن. ڪيترن ئي ڏينهن کان گيس، بجلي ۽ پاڻي جي فراهمي بند آهي، جنهن سبب رهواسي عذاب جي زندگي گذاري رهيا آهن. اڳواڻن جو چوڻ هو ته پورهيت اڪرم زهراڻي کي اغوا ڪيو ويو آهي پر اڃا تائين پوليس کيس آزاد ڪرائڻ ۾ ناڪام رهي آهي، جيڪا انتظاميه جي نااهلي جو واضع ثبوت آهي احتجاج ڪندڙ اڳواڻن حڪمرانن کان مطالبو ڪيو ته مغوي پورهيت اڪرم زهراڻي کي فوري طور بازياب ڪرايو وڃي ۽ گهگهر جي رهواسين کي گيس، بجلي ۽ پاڻي جهڙيون بنيادي سهولتون فوري بحال ڪيون وڃن، ٻي صورت ۾ احتجاج جو دائرو وڌيڪ وڌايو ويندو.