عمر کوئی بھی ہو: مکمل بہراپن یا کم سننے کا مسئلہ ایک ہی علاج سے مستقل حل

ایک نئی تحقیق کے مطابق تیار کی گئی جین تھراپی کے ایک انجیکشن سے انسانوں میں کم ہوتی ہوئی سماعت کی صلاحیت صرف چند ہفتوں میں بحال کی جا سکتی ہے۔ سوئیڈن کے کیرولنسکا انسٹیٹیوٹ سے تعلق رکھنے والے ماہرین نے بتایا ہے کہ اس جدید تھراپی نے بچوں اور بڑوں میں پیدائشی سماعت سے محرومی یا کم سننے کی صلاحیت کو بہتر بنایا ہے۔ طبی تجربات میں ایک سات سالہ بچے کی سننے کی صلاحیت مکمل طور پر بحال ہو گئی۔ جرنل نیچر میڈیسن میں شائع ہونے والی تحقیق میں پیش کیے گئے کلینیکل ٹرائل کے مطابق OTO-F جین کی صحت مند کاپی کو کان کے اندرونی حصے میں انجیکشن کے ذریعے داخل کرنے سے تمام 10 مریضوں کی سماعت میں بہتری آئی۔ چھوٹے پیمانے پر کیے گئے اس تجربے میں وہ افراد شامل تھے جو OTO-F نامی جین میں خرابی کی وجہ سے جینیاتی قسم کے بہراپن یا بہت کم سننے کی صلاحیت کا شکار تھے۔ ایسی خرابی اوٹوفرلن پروٹین کی کمی کے باعث ہوتی ہے، جو آواز کے سگنلز کو کان سے دماغ تک پہنچانے میں کلیدی کردار ادا کرتا ہے۔