ڪارپوريٽ فارمنگ جي نالي ۾ ھر ضلعي اندر نئين رياست قائم ڪئي ويندي: اياز لطيف پليجو

سنڌ ۾ ھٿرادو غربت ۽ بدحالي مسلط ڪئي وئي آھي، ڪرپشن ۽ اقتدار خاطر سنڌ جي لکين ايڪڙ زمين ۽ وسيلا ڏنا ويا آهن

پڊعيدن(رپورٽر)قومي عوامي تحريڪ جي سربراھ اياز لطيف پليجي چيو تہ ڪارپوريٽ فارمنگ جي نالي ۾ سنڌ جي لکين ايڪڙ زمين ڌارين ماڻهن ڏئي ڌرتي ڌڻين کي پنهنجي ڌرتي تان بي دخل ڪري حق حڪمراني کان پري رکڻ جي سازش آهي. ڪارپوريٽ فارمنگ جي نالي ۾ ھر ضلعي اندر نئين رياست قائم ڪئي ويندي. انھي ڪري اھو منصوبو ڪنھن بہ ريت سنڌ جي عوام کي قبول ناھي. سنڌ حڪومت ڪارپوريٽ فارمنگ منصوبو رد ڪرڻ جو نوٽيفڪيشن جاري ڪري. اياز لطيف پليجي چيو تہ سنڌ ۾ ھٿرادو غربت ۽ بدحالي مسلط ڪئي وئي آھي. پيپلز پارٽي ڪرپشن ۽ اقتدار خاطر سنڌ جي لکين ايڪڙ زمين ۽ وسيلا ڏئي ڇڏيا آھن. پيپلز پارٽي اقتدار لاءِ ھر سودو ڪرڻ لاء تيار آھي، انڪري چوٿون ڀيرو اقتدار تي مسلط ڪيو ويو آھي. سنڌ ۾ ڌاڙيل راڄ آھي. روزگار ناھي. بک، بدحالي ۽ بيروزگاري آھي. جھالت ۽ لاقانونيت آھي. سنڌ جا ماڻھو عوام دشمن نظام مان بيزار آھن. اياز لطيف پليجي چيو تہ سنڌ سڀ کان وڌيڪ روينيو ڏيندڙ صوبو آھي. سنڌ جو تيل، گئس ۽ ٻيا وسيلا وفاق جي حوالي آھن. سنڌ جي ڪمائي تي سڄو ملڪ ھلي ٿو. سنڌ ۾ جتان گئس نڪري ٿو اتي جا ماڻھو گئس جي سھولت کان محروم ڪيا ويا آھن. ملڪ ۾ سڀ کان وڌيڪ بجلي جي لوڊ شيڊنگ سنڌ ۾ آھي. گئيس جي لوڊ شيڊنگ جو عذاب بہ سنڌ ۾ آھي. سڀ کان وڌيڪ مھانگائي بہ سنڌ ۾ آھي. ملڪ ۾ سڀ کان وڌيڪ ڪرپشن بہ سنڌ ۾ آھي. اياز لطيف پليجي چيو تہ سنڌ کي پنھنجي حصي جو پاڻي بہ نٿو ڏنو وڃي. پنجاب ڏيڍ صدي کان سنڌ جي پاڻي تي ڌاڙا ھڻي رھيو آھي. سنڌ کي پاڻي جو حساب سميت تيل، گئس، ڪوئلو ۽ ٻي لٽيل دولت جو حساب سنڌ جي ماڻهن کي ڏنو وڃي.