صنعان قريشي پاران سنڌ جي وحدت خلاف سازشن تي مزاحمت جو اعلان
آفاق احمد جهڙا ماڻهو سنڌ ۽ سنڌين خلاف بيان ڏئي نفرت پکيڙي رهيا آهن: صنعان قريشي
ملير (رپورٽ: عبدالرشيد مورجھريو) جيئي سنڌ قومي محاذ (جسقم) جي سربراهه صنعان خان قريشي چيو آهي ته سنڌ جي وحدت، بقا ۽ تاريخي حيثيت خلاف مختلف سازشون ٿي رهيون آهن، جن جو هر سطح تي مقابلو ڪيو ويندو ٽنڊوالهيار ۾ 14 جون تي ٿيندڙ احتجاجي ريلي ۽ پيادل مارچ بابت جاري ڪيل بيان ۾ هن چيو ته سنڌ سنڌين جو تاريخي وطن آهي ۽ سنڌ خلاف ڪنهن به قسم جون سازشون يا منصوبا ڪنهن صورت ۾ برداشت نه ڪيا ويندا. هن سنڌي قوم کي احتجاجي پروگرام ۾ ڀرپور شرڪت جي دعوت پڻ ڏني صنعان خان قريشي چيو ته تجويز ڪيل 28هين آئيني ترميم کي سنڌ مڪمل طور تي رد ڪري ٿي، ۽ جيڪڏهن اها زبردستي لاڳو ڪرڻ جي ڪوشش ڪئي وئي ته سنڌ پنهنجي وحدت ۽ وجود جي تحفظ لاءِ سياسي مزاحمت ڪندي. هن الزام لڳايو ته ڪجهه عناصر سنڌ ۽ اردو ڳالهائيندڙن وچ ۾ پيدا ٿيندڙ ويجهڙائي جا مخالف آهن. سندس چوڻ هو ته اهڙن عنصرن جو سماجي سطح تي بائيڪاٽ ڪيو وڃي. جسقم سربراهه وڌيڪ چيو ته آفاق احمد جهڙا ماڻهو سنڌ ۽ سنڌين خلاف بيان ڏئي نفرت پکيڙي رهيا آهن، جنهن کي هو سخت لفظن ۾ رد ڪن ٿا. هن چيو ته جيڪي ماڻهو سنڌ ۾ رهي ڪري سنڌ جي وسيلن مان فائدو وٺن ٿا، انهن کي سنڌ جي ڌرتي سان وفاداري جو مظاهرو ڪرڻ گهرجي، ٻي صورت ۾ اهڙن عملن کي قبول نه ڪيو ويندو هن وڌيڪ چيو ته 14 جون تي ٽنڊوالهيار ۾ سنڌ جي وحدت خلاف سازشن، بدامني، قبيلائي جهيڙن ۽ منشيات جي وڌندڙ رجحان خلاف احتجاجي ريلي ۽ پيادل مارچ ڪيو ويندو هن اعلان ڪيو ته احتجاجي تحريڪ ۾ سنڌي قوم کي ڀرپور شرڪت جي دعوت ڏني وڃي ٿي، ۽ جيڪڏهن مسئلن جو حل نه نڪتو ته تحريڪ کي وڌيڪ وسيع ڪيو ويندو۔