اڳوڻي صوبائي وزير غلام مرتضيٰ بلوچ شهيد جي ڇهين ورسي ملهائي وئي
ورسي تقريب ۾ ايم اين اي آغا رفيع الله، ايم پي ايز سليم بلوچ، ساجد جوکيو، راجا رزاق ۽ ٻيا شريڪ
ملير(رپورٽ: عبدالرشيد مورجھريو) ملير مان چونڊيل پيپلزپارٽي جي اڳوڻي صوبائي وزير ۽ عوامي اڳواڻ غلام مرتضيٰ بلوچ شهيد جي ڇهين ورسي سندس اباڻي ڳوٺ فقير محمد بلوچ ڳوٺ، گڊاپ ۾ عقيدت ۽ احترام سان ملهائي وئي. ان موقعي تي هڪ پروقار تقريب منعقد ڪئي وئي، جنهن ۾ پاڪستان پيپلز پارٽي جي اڳواڻن، ڪارڪنن ۽ علائقي واسين وڏي انگ ۾ شرڪت ڪئي.تقريب ۾ ملير سان تعلق رکندڙ پاڪستان پيپلز پارٽي جي چونڊيل نمائندن، قومي اسيمبلي جي ميمبر آغا رفيع الله، سنڌ اسيمبلي جي ميمبرن سليم بلوچ، ساجد جوکيو، راجا رزاق سميت ٻين سياسي ۽ سماجي شخصيتن شرڪت ڪئي. ان موقعي تي غلام مرتضيٰ بلوچ شهيد جي فرزند ۽ سنڌ اسيمبلي جي ميمبر يوسف مرتضيٰ بلوچ پڻ موجود هو.تقريب دوران مرحوم غلام مرتضيٰ بلوچ جي ايصالِ ثواب لاءِ قرآن خواني ۽ خصوصي دعا جو اهتمام ڪيو ويو. مقررن غلام مرتضيٰ بلوچ جي عوامي، سياسي ۽ سماجي خدمتن کي ڀيٽا پيش ڪندي چيو ته مرحوم هڪ بهادر، مخلص ۽ عوام دوست اڳواڻ هو، جنهن پنهنجي سڄي زندگي عوام جي خدمت، سندن مسئلن جي حل ۽ جمهوري قدرن جي واڌاري لاءِ وقف ڪري ڇڏي هئي.مقررن چيو ته غلام مرتضيٰ بلوچ هميشه ظلم، جبر ۽ ناانصافي خلاف آواز اٿاريو ۽ عوام جي حقن لاءِ جدوجهد ڪندو رهيو. سندس سياسي بصيرت، سادگي، عوام سان محبت ۽ بي لوث خدمت اڄ به ماڻهن جي دلين ۾ زندهه آهي. هنن چيو ته غلام مرتضيٰ بلوچ شهيد جون خدمتون هميشه ياد رکيون وينديون ۽ سندس مشن کي عوامي خدمت ذريعي اڳتي وڌايو ويندو.تقريب جي پڄاڻي تي مرحوم جي بلند درجات، ملڪ جي سلامتي، ترقي ۽ خوشحالي لاءِ خصوصي دعائون پڻ گهريون ويون.