ڪنري مان اغوا ڄاڻايل نوجوان ناري وارثن سميت عمرڪوٽ جي عدالت پهچي وئي
نياز ڪنڀر اغوا ڪري نئون ڪوٽ ۽ بعد ۾ ڪراچي ۾ قيد رکيو، وجهه وٺي اتان فرار ٿي هتي پهتيس: سنيتا مهاراج
عمرڪوٽ (رپورٽ:ڪانجي مل رکيسر) ٽي مهينا اڳ ڪنري مان اغوا ٿيل سنيتا ڌي تارو مهاراج آخرڪار بازياب ٿي وئي، نياز ڪنڀر نالي شخص کيس نئون ڪوٽ ۽ ڪراچي جي مختلف علائقن ۾ لڪائي رکيو، جتان هوءَ موقعي جو فائدو وٺي عمرڪوٽ پهتي ۽ پنهنجي والدين سان رابطو ڪيو، سنيتا جي خاندان پاران وڪيل جي معرفت سيشن جج صاحب جي عدالت ۾ درخواست داخل ڪئي وئي، جڏهن ته ڄاڻايل نياڻي جي اغوا جو ڪيس اڳ ۾ سول جج ون جي ڪورٽ ۾ هلندڙ هو، جنهن سبب نئين درخواست کي قانوني طريقيڪار موجب مئجسٽريٽ جي عدالت ڏانهن منتقل ڪيو ويو، مئجسٽريٽ جي ڪورٽ ۾ نياڻي جو بيان رڪارڊ ڪرڻ بعد کيس والدين حوالي ڪيو ويو، جنهن مهل عدالت ۾ موجود ماڻهن ۾ جذباتي منظر ڏسڻ ۾ آيا، هن اهم ڪيس جي پيروي سنڌ هاءِ ڪورٽ جي سينيئر وڪيل ميان بخش کوسو ۽ وڪيل ڀواني شنڪر مالهي ڪري رهيا آهن، جيڪي نياڻي لاءِ انصاف ۽ جوابدارن کي سزا ڏيارڻ لاءِ قانوني جدوجهد جاري رکي رهيا آهن.