ٺٽو ويجهو ڳوٺ حاجي مٺو گلاڻي خاصخيلي جي اسڪول جي عمارت تباهه حال بڻيل
پرائمري اسڪول جي عمارت جي ڇت جا چاپڙ ڪِرڻ معمول بڻيل، شاگردن جون زندگيون داءَ تي لڳل
ٺٽو ( ڊر)ٺٽي تعلقي جي يونين ڪائونسل اونگر ۾ 1985ع ۾ ٺهيل پرائمري اسڪول مرمت نه ٿيڻ سبب زبون حالت ۾ تبديل ٿي ويو آهي، ڇت مان روزانو چاپر ڪرڻ لڳا آهن ۽ ڀتين ۾ وڏيون دراڙون پئجي ويون آهن. مينهن پوڻ تي ڪلاس پاڻي سان ڀرجي وڃن ٿا، فرنيچر به ڀڃيل ۽ ناڪاره بڻيل آهي.مقامي رهواسين موجب والدين ۽ استاد خوف جي فضا ۾ تعليم جاري رکن ٿا، ڪيترائي شاگرد بارش جي ڏينهن اسڪول وڃڻ کان به ڪترائن ٿا. ڪيترائي ڀيرا تعليم کاتي کي لکت ۾ آگاهه ڪرڻ باوجود ڪو به قدم نه کنيو ويو، آفيسر بجيٽ جي کوٽ جو جواز پيش ڪري رهيا آهن.سماجي اڳواڻن چيو ته جيڪڏهن فوري مرمت نه ٿي ته ڪنهن به وقت جاني نقصان جو انديشو آهي، جيڪو حڪومت ۽ لاڳاپيل کاتي جي نااهلي جو نتيجو هوندو.