ڊپٽي ڪمشنر عمرڪوٽ نويدالرحمان لاڙڪ جي صدارت هيٺ اهم اجلاس

عمرڪوٽ (رپورٽ:ڪانجي مل رکيسر) ڊپٽي ڪمشنر عمرڪوٽ نويدالرحمان لاڙڪ جي صدارت ۾ وفاقي حڪومت ۽ هوم ڊپارٽمينٽ، حڪومت سنڌ جي هدايتن تحت ٺهيل ضلعي ايمپليمينٽيشن ڪاميٽي (District Implementation Committee) جو هڪ اهم اجلاس ڊپٽي ڪمشنر آفيس جي دربار هال ۾ منعقد ٿيو. اجلاس ۾ پاڪستان آرمي، پاڪستان رينجرز، پوليس، سول ڊيفنس، حساس ادارن جي آفيسرن ۽ ٻين لاڳاپيل محڪمن جي نمائندن شرڪت ڪئي. ان موقعي تي اجلاس ۾ ضلعي عمرڪوٽ ۾ امن امان جي صورتحال، هٿيارن جي لائسنسن، غيرقانوني سرگرمين جي روڪٿام، حساس هنڌن جي سيڪيورٽي، دهشتگردي خلاف قدمن، مذهبي هم آهنگي جي فروغ، اسڪولن ۽ عوامي هنڌن تي سيڪيورٽي انتظامن سميت ٻين اهم معاملن جو تفصيلي جائزو ورتو ويو. ڊپٽي ڪمشنر نويدالرحمان لاڙڪ اجلاس کي خطاب ڪندي چيو تہ ضلعي ايمپليمينٽيشن ڪاميٽي جو مقصد صوبائي ۽ وفاقي حڪومت جي هدايتن موجب ضلعي سطح تي امن، سلامتي ۽ عوامي تحفظ بابت قدمن تي مؤثر عملدرآمد کي يقيني بڻائڻ آهي. ھن وڌيڪ چيو تہ سڀئي لاڳاپيل کاتا پنهنجي دائري ڪار ۾ ايندڙ فيصلن تي فوري عمل ڪن ۽ ايندڙ اجلاس ۾ ان بابت رپورٽ پيش ڪن. ڊپٽي ڪمشنر عمرڪوٽ وڌيڪ چيو تہ ضلعي ۾ ڊرون ڪيمرا استعمال ڪندڙ سڀني ماڻهن جي رجسٽريشن ضلعي انتظاميہ وٽ ڪرائي وڃي، جيئن انهن جو مڪمل ڊيٽا رڪارڊ تي آڻي سگهجي. ان موقعي تي ايس ايس پي عمرڪوٽ عذير احمد ميمڻ اجلاس کي آگاهي ڏيندي چيو تہ ضلع ۾ سيڪيورٽي انتظامن کي وڌيڪ سخت ڪيو ويو آهي ۽ پوليس اهلڪار باقاعده پيٽرولنگ ڊيوٽي سرانجام ڏئي رهيا آهن. ان موقعي تي پاڪستان آرمي 22 پنجاب رجمنٽ ڇور ڪينٽ جا ميجر مجيب الله ڪاڪڙ ۽ پاڪستان رينجرز سنڌ نيوڇور ونگ ڪمانڊر عمران بہ اجلاس ۾ سيڪيورٽي انتظامن بابت تفصيلي بريفنگ ڏني. آخر ۾ ڊپٽي ڪمشنر عمرڪوٽ چيو تہ ضلعي ۾ امن و امان برقرار رکڻ، عوامي تحفظ ۽ حساس علائقن جي سيڪيورٽي لاءِ سڀئي لاڳاپيل ادارا مڪمل هم آهنگي سان ڪم ڪن، جيئن ضلعي سطح تي امن جو استحڪام ۽ عوام جو اعتماد وڌي.