اب ایکشن نظر آئے گا، سسٹم میں موجود خامیاں ختم کریں گے، آئی جی سندھ

کراچی (رپورٹر) آئی جی سندھ رفعت مختار نے کہا ہے کہ تبادلے اور تقرریاں ہوچکی ہیں، اب عمل ہوتا نظر آئے گا، عوام کو بھی ہم سے توقعات ہیں، انشاء اللہ ہم بہتری لائیں گے۔ سندھ ہائی کورٹ میں پیشی کے بعد میڈیا سے بات کرتے ہوئے آئی جی سندھ رفعت مختار نے کہا کہ ہمیں ماضی میں نہیں جانا چاہیے، عدالت اور عوام کی توقعات کو مایوسی میں نہ بدلا جائے۔ ہمیں کچھ کرنا ہے، آپ خود بتائیں کہ تبدیلی آئی ہے یا نہیں، سسٹم میں خامیاں ہیں، ان خامیوں کو دور کرنا ہے، ایک دو روز میں امن و امان کی صورتحال بہتر ہو جائے گی۔ امن و امان کی صورتحال پر ایکشن لے رہے ہیں، سندھ پولیس میں بڑے پیمانے پر تقرریاں ہوئی ہیں، جرائم پیشہ افراد کا خاتمہ کریں گے۔