گهگهر ايڪشن ڪميٽي جي سڏ تي گيس جي بندش خلاف ريلي ۽ ڌرڻو
ملير (رپورٽ: عبدالرشيد مورجھريو) گهگهر شهر ۾ گهگهر ايڪشن ڪميٽي جي سڏ تي گيس جي ڊگهي بندش ۽ بنيادي شهري سهولتن جي اڻهوند خلاف احتجاجي ريلي ڪڍي ويئي، جنهن ۾ علائقي واسين وڏي انگ ۾ شرڪت ڪئي۔ مظاهرين هٿن ۾ پلي ڪارڊ ۽ بينر کڻي گيس بحالي ۽ مسئلن جي حل لاءِ سخت نعريبازي ڪئي۔ريلي شهر جي مختلف رستن تان گذرندي قومي شاهراھ وٽ پهتي، جتي اڳواڻن خطاب ڪيو۔ ان موقعي تي جان محمد جاني، فياض اتيرو، علي ٻٻر ۽ ٻين اڳواڻن چيو ته گهگهر ۾ رمضان جي ڀلاري مهيني ۾ به گيس جي بندش سبب ماڻهو سخت پريشانين کي منهن ڏئي رهيا آهن، هنن وڌيڪ چيو ته گهگهر ۾ رڳو گيس جو مسئلو ناهي پر صاف پاڻي، نيڪال جو ناقص نظام، ٽٽل رستا ۽ صفائي جي اڻهوند به وڏا مسئلا بڻيل آهن۔ هنن الزام هنيو ته لاڳاپيل ادارا ۽ چونڊيل نمائندا علائقي جي مسئلن کان لاتعلق بڻيل آهن۔ اڳواڻن خبردار ڪيو ته جيڪڏهن فوري طور گيس جي فراهمي بحال نه ڪئي ويئي ۽ بنيادي سهولتون مهيا نه ڪيون ويون ته احتجاج جو دائرو وڌايو ويندو ۽ سخت احتجاجي تحريڪ هلائي ويندي۔مظاهرين اعليٰ اختيارين کان مطالبو ڪيو ته گهگهر شهر کي بنيادي شهري حق فراهم ڪيا وڃن ۽ لاڳاپيل ادارن کي پابند بڻايو وڃي