سنڌي ادبي سنگت شاخ ملير جي دستوري گڏجاڻي قمبر ٻٽ جي صدارت هيٺ ٿي
مجيب سنڌي غزل، اصغر مهرائي غزل، سڪندر سرواڻ ڪافي، سيد غفور شاھ تقوي غزل پيش ڪيا
ملير (رپورٽ: عبدالرشيد مورجھريو) سنڌي ادبي سنگت شاخ ملير جي دستوري گڏجاڻي نوجوان شاعر قمبر ٻٽ جي صدارت هيٺ عوامي پريس ڪلب ملير ۾ ٿي گذري، جنهن ۾ هيٺين دوستن پنهنجا نڪور اسم پيش ڪيا، مجيب سنڌي غزل، اصغر مهرائي غزل، سڪندر سرواڻ ڪافي، سيد غفور شاھ تقوي غزل، سجاد علي شاھ غزل، ۽ قمبر ٻٽ غزل پيش ڪيو، گڏجاڻي جي ڪارروائي شاخ سيڪريٽري اصغر مهرائي هلائي، صدارتي راءِ ڏيندي نوجوان شاعر قمبر ٻٽ چيو ته اڄوڪي گڏجاڻي ۾ جيڪي به اسم پيش ڪيا ويا آهن اهي نواڻ سان ڀرپور آهن، نوجوان شاعر پنهنجي شاعري وسيلي شعوري سجاڳيءَ جو سڏ ڏئي رهيا آهن، هن چيو ته ادب هر طبقي ۽ سماج جو آئينو هوندو آهي، جنهن ۾ ظالم ۽ مظلوم جو وير رهيو آهي. گڏجاڻي دوران تازو وڇڙي ويل اديب ممتاز مهر جي وفات تي ڏک جو اظهار ڪيو ويو گڏجاڻي ۾ شريڪ اديبن چيو ته ممتاز مهر جسماني طور ضرور وڇڙي ويو آهي پر سندس ادبي ڪم هميشه زنده رهندو.