اياز لطيف پليجي پاران سڪرنڊ واقعي جي سخت لفظن ۾ مذمت

حيدرآباد (بيورو) قومي عوامي تحريڪ جي سربراھ اياز لطيف پليجي سڪرنڊ جي ڳوٺ ماڙي جلباڻي واقعي جي سخت مذمت ڪندي چيو آهي تہ سرعام ماڻهن کي گولين جو کاڄ بڻائڻ هڪ کليل دهشتگردي آهي، جيڪڏهن ڪير بہ ڪنهن ڏوھ ۾ ملوث هجي ٿو تہ ان کي ملڪ جي قانون ۽ آئين مطابق ڪيس داخل ڪري ڪورٽ ۾ پيش ڪيو ويندو آهي۔ اياز لطيف پليجي چيو آهي تہ سرعام گوليون هلائي رت جي راند کيڏڻ ۽ ماڻهن کي کنڀي گم ڪرڻ جي قانون قطعي اجازت نہ ٿو ڏي۔ اياز لطيف پليجي چيو تہ سڄي سنڌ ۾ هر روز ڪڏهن نياڻين سان ريپ ڪري لاش ڏنا وڃن ٿا، ڪڏهن گولين جو کاڄ بڻائي سنڌ جي ماڻهن جو رت وهايو وڃي ٿو۔ اياز لطيف پليجي چيو تہ سڪرنڊ ماڙي جلباڻي جي واقعي جي فورن صاف شفاف جاچ ڪرائي وڃي ۽ ملوث ماڻهن کي فورن قانون جي ڪٽهڙي ۾ آندو وڃي۔ ۽ شھيدن جي وارثن سان انصاف ڪيو وڃي۔