ملير پوليس پاران ڏوهاري ٽولي کي گرفتار ڪرڻ جي دعويٰ
ڪارروائي دوران ٽن جوابدارن کي گرفتار ڪيو ويو: ايس ايس پي ملير
ملير (رپورٽ: عبدالرشيد مورجھريو) ڪراچي شهر ۾ اسٽريٽ ڪرائم ۽ موٽرسائيڪلن جي چورين ۾ سرگرم خطرناڪ ڏوهاري ٽولي کي پوليس طرفان گرفتار ڪرڻ جي دعوا ڪئي ويئي آهي ان سلسلي ۾ ايس ايس پي ملير ڊاڪٽر عبدالخالق پيرزادي جو چوڻ هو ته ڪارروائي ٿاڻي شاهه لطيف جي حدن ۾ دوران گشت ڪئي وئي، جتي پوليس مشڪوڪ هٿياربند موٽرسائيڪل سوارن کي روڪڻ جو اشارو ڪيو ته جوابدارن پوليس تي فائرنگ ڪري ڏني ۽ اتان فرار ٿيڻ جي ڪوشش ڪئي، پر پوليس سندن پٺيان لڳي ٽنهي جوابدارن کي گرفتار ڪري ورتو. گرفتار ٿيل جوابدارن جا نالا موحيدالدين، اويس ۽ فياض ٻڌايا ويا آهن جيڪي ڪيترين ئي ڏوهن ۾ گهربل آهن.پوليس موجب جاچ دوران جوابدارن ڪيترين ئي ڏوهن جو اعتراف ڪيو آهي جن ۾ هٿيارن جي زور تي شهرين کي ڦرڻ، خاص طور تي 125 سي سي موٽرسائيڪل سوارن کي نشانو بڻائڻ شامل آهي.گرفتار جوابدارن وٽان ٽي چوريل ٿيل 125 موٽرسائيڪلون، ٻه پسٽل، گوليون ۽ روڪ رقم هٿ آئي آهي.پوليس موجب هٿ آيل موٽرسائيڪلون لائنز ايريا، رضويه ۽ جمشيد روڊ جي حدن مان چورايون ويون هيون.ايس ايس پي ملير ٻڌايو ته مک جوابدار موحيدالدين اڳ به 17 کان وڌيڪ ڪيسن ۾ گرفتار ٿي چڪو آهي. گرفتار جوابدارن خلاف قانوني ڪارروائي شروع ڪئي وئي آهي ۽ وڌيڪ جاچ جاري آهي