پورٽ قاسم متاثرن جو هنگامي ڪٺ، متاثرين جي ڪيس متعلق عدالتي ڪارروائي تي ڳڻتي جو اظهار

ملير (رپورٽ: عبدالرشيد مورجھريو) مورند قيصراڻي ڳوٺ ۾ پورٽ قاسم اٿارٽي کان متاثر ڳوٺاڻن جو اهم اجلاس منعقد ٿيو، جنهن ۾ عدالتي ڪارروائين تي سخت تحفظات ظاهر ڪندي مطالبو ڪيو ويو ته سندن ڪيس موجوده بينچ بدران ٻي بينچ آڏو مقرر ڪيو وڃي۔اجلاس ۾ چيو ويو ته پورٽ قاسم متاثر 50 سالن کان وڌيڪ عرصي کان انصاف لاءِ عدالتن جا چڪر ڪاٽي رهيا آهن۔ متاثرين موجب سنڌ هاءِ ڪورٽ سندن حق ۾ فيصلو ڏنو هو، پر اپيل جو وقت گذرڻ باوجود ڪيس ٻيهر بحال ڪيو ويو۔ هنن الزام هنيو ته ماضي ۾ پورٽ قاسم اٿارٽي جو وڪيل رهندڙ ۽ هن وقت هاءِ ڪورٽ جي جج فيصل محمد ڪمال عالم پاران 25 فيبروري تي اخبارن م اشتهار شايع ڪرايو ويو متاثرين جو چوڻ هو ته 27 فيبروري تي عدالت ۾ پيش ٿيڻ باوجود کين جج سامهون پيش ٿيڻ نه ڏنو ويو ۽ پوليس ذريعي عدالت کان ٻاهر ڪڍيو ويو۔ هنن دعويٰ ڪئي ته 2017ع ۾ هڪ سول ريفرنس ڪيس دوران جسٽس فيصل ڪمال عالم پاڻ پورٽ قاسم اٿارٽي جو وڪيل رهڻ سبب ڪيس نه هلائڻ جو اظهار ڪيو هو، تنهن هوندي به هاڻي ساڳي معاملي ۾ اپيل ٻڌي اسٽي آرڊر جاري ڪيو ويو آهي، جيڪو سندن نظر ۾ غير قانوني آهي۔اجلاس ۾ اعليٰ اختيارين کان مطالبو ڪيو ويو ته زميندارن کي شفاف انصاف فراهم ڪيو وڃي ۽ ڪيس ٻي بينچ آڏو منتقل ڪيو وڃي۔ اجلاس ۾ فيصلو ڪيو ويو ته عدالتي ڪارروائين جي نگراني لاءِ اياز قيصراڻي جي اڳواڻي م ڪميٽي جوڙي ويئي جيڪا نئين پٽيشن داخل ڪرڻ سان گڏ چونڊيل نمائندن سان پڻ رابطا ڪندي۔