وفاقي حڪومت اسٽيل مل جي پورهيتن جون رهتون ڏيڻ لاءِ 2 ارب 87 ڪروڙ رپيا جاري ڪري ڇڏيا
وزارت صنعت ۽ پيداوار پاران سفارش کانپوءِ وفاقي حڪومت منظوري ڏئي رقم منتقل ڪري ڇڏي
ملير(رپورٽ: عبدالرشيد مورجھريو) وفاقي حڪومت اسٽيل مل جي پورهيتن جون رهتون ڏيڻ لاءِ 2 ارب 87 ڪروڙ رپيا جاري ڪري ڇڏيا آهن. وزارت صنعت ۽ پيداوار پاران سفارش کانپوءِ وفاقي حڪومت منظوري ڏئي رقم منتقل ڪري ڇڏي.ياد رهي ته اسٽيل مل مان 1377 پورهيتن کي جبري طور نوڪرين تان برطرف ڪيو ويو هو، جنهن خلاف پورهيت سراپا احتجاج بڻيل آهن. پورهيت اڳواڻ ڌڻي بخش سمون، اڪبر ناريجو ۽ ٻين ميڊيا سان ڳالهائيندي چيو ته اسان جو مطالبو آهي ته جبري برطرف ڪيل پورهيتن کي ٻين ادارن ۾ بحال ڪيو وڃي، اسان ڪيترن ڏينهن کان احتجاج ڪري رهيا آهيون ۽ وڏي وزير سان به ملاقاتون ڪري چڪا آهيون.اڳواڻن جو وڌيڪ چوڻ هو ته پورهيتن کي رهائش لاءِ فيز-4 ۾ پلاٽ ۽ ٻيون مراعتون ڏنيون وڃن، جڏهن ته موجوده منتقل ڪيل رقم اڳ ۾ رٽائرڊ ٿيل پورهيتن ۾ ورهائي وڃي.انهن زور ڀريو ته 1377 جبري برطرف پورهيتن کي مختلف سرڪاري کاتن ۾ فوري طور تي بحال ڪيو وڃي، ڇو ته انهن سان وڏي ناانصافي ٿي آهي