سنڌ ۾ وڌندڙ بدامني عوام جو ساھھ سڪائي ڇڏيو آهي: محمد حسين محنتي

ڪراچي(اسٽاف رپورٽر)جماعت اسلامي سنڌ جي امير اڳوڻي ايم اين اي محمد حسين محنتي چيو آهي ته ڪراچي کان ڪشمور سنڌ ۾ وڌندڙ بدامني عوام جو ساه سڪائي ڇڏيو آهي. ڪچي توڙي پڪي جي ڌاڙيلن خلاف بي رحماڻو آپريشن ۽ پوليس کاتي کي غير سياسي بنائڻ کان سواءِ ڌاڙيل راڄ جو خاتمو ناممڪن لڳي ٿو. هن اڄ هڪ بيان ۾ چيو تہ حڪومت شهرين جي جان توڙي مال جي حفاظت ڪرڻ ۾ ناڪام ثابت ٿي آهي.سموري سنڌ بدامني جي باھ ۾ سڙي رھي آھي. ماڻھن کي ڀنگ لاءِ اغوا ڪرڻ ھڪ منافعي وارو ڪاروبار بڻجي چڪو آھي جنهن ۾ پوليس بااثر ماڻهو ۽ ڌاريلن جو گڏيل نيٽ ورڪ ڪم ڪري پيو . سنڌ جي گاديءَ واري هنڌ ڪراچي ۾ هلندڙ صرف 2 مهينن دوران ڏوهن جون 15 هزار وارداتون 26 شهرين جو قتل هزارين ماڻهن کي پنهنجي قيمتي گاڏين کان محروم رکڻ سنڌ حڪومت ۽ پوليس جي ناڪامي آهي. عوام اڳ ۾ ئي موت مار مهانگائي ، بيروزگاري ، ڳاٽي توڙ يوٽيلٽي بلز جي ڪري سخت پريشان آهن ويتر بدامني جي راڪاس عوام جي اندر عدم تحفظ جو احساس ۽ زندگي زهر بڻائي ڇڏي آهي.#