سجاول ۾ پورهيت جو نياڻين سميت سهري خلاف احتجاجي مظاهرو
حق آباد ڪالوني واسي عبدالحميد ميربحر پنهنجي نياڻين سان گڏ پريس ڪلب پهچي احتجاج ڪيو
سجاول (رپورٽر) سجاول شھر جي علائقي حق آباد ڪالوني جي رهواسي عبدالحميد ولد احسان ميربحر پنهنجي نياڻين صاديقا، معنسرا، علينا ۽ آيت سان گڏ سجاول پريس ڪلب پهچي دانھيندي الزام لڳايو آهي ته سندس سھرو سومار، جيڪو مبينا طور لالچي طبيعت جو ماڻهو آهي، سندس گهرواري کي پيسن عيوض وڪرو ڪري ڇڏيو آهي. عبدالحميد جو چوڻ هو ته هاڻي جوابدار سندس نياڻين جي پويان لڳو پيو آهي ۽ مطالبو ڪري رهيو آهي ته ٻار کيس حوالي ڪيا وڃن، جنهن سبب هو سخت پريشان آهي. هن خدشو ظاهر ڪيو ته جوابدار سندس نياڻين کي به نقصان پهچائي سگهي ٿو يا کين وڪرو ڪرڻ جي ڪوشش ڪري سگهي ٿو. هن اختيارين کان اپيل ڪئي ته کيس ۽ سندس نياڻين کي تحفظ فراهم ڪيو وڃي ۽ معاملي جي شفاف جاچ ڪرائي کيس انصاف ڏنو وڃي