اسسٽنٽ ڪمشنر ملير ون سونا خان چانڊيو جي صدارت هيٺ اجلاس
قومي پاليسي 2024 تحت انتهاپسندي جي روڪٿام لاءِ اهم اجلاس ڊي سي آفيس ۾ ٿيو
ملير (رپورٽ: عبدالرشيد مورجھريو) اسسٽنٽ ڪمشنر ملير ون سونا خان چانڊيو جي صدارت هيٺ قومي پاليسي 2024 تحت انتهاپسندي جي روڪٿام لاءِ هڪ اهم اجلاس ڊي سي آفيس ڪمپليڪس ملير ۾ ٿيو جنهن ۾ مختلف پريس ڪلبن جي نمائندن، اليڪٽرانڪ ۽ پرنٽ ميڊيا سان لاڳاپيل صحافين، سوشل ميڊيا ايڪٽوسٽن ۽ ڪيبل آپريٽرن شرڪت ڪئي.اجلاس ۾ عوامي پريس ڪلب ملير جي وفد سيد سجاد علي شاهه، سيد عنايت علي شاهه ۽ طارق سهتو جي اڳواڻي ۾ شرڪت ڪئي. ان موقعي تي وفد ڳالهائيندي چيو ته ميڊيا سماج ۾ امن، رواداري ۽ برداشت جي واڌ ويجهه لاءِ اهم ڪردار ادا ڪري سگهي ٿي، بشرطيڪه صحافتي آزادي ۽ اظهارِ راءِ جي آئيني حقن کي يقيني بڻايو وڃي.اجلاس کي خطاب ڪندي اي ڊي سي ون سونا خان چانڊيو چيو ته حڪومت جي قومي پاليسي جو بنيادي مقصد تشدد، انتهاپسندي ۽ نفرت انگيز سوچ جو خاتمو آهي. هن زور ڏنو ته ميڊيا، سول سوسائٽي ۽ سماجي اڳواڻ گڏيل طور نوجوان نسل کي انتهاپسندي کان محفوظ رکڻ لاءِ مثبت ۽ تعميري بيانيي کي هٿي ڏين.اي ڊي سي ون خاص طور سوشل ميڊيا جي ڪردار تي روشني وجهندي چيو ته افواهن، گمراهه ڪندڙ اطلاعن ۽ نفرت انگيز مواد جي روڪٿام لاءِ ذميواراڻي صحافت ۽ تصديق ٿيل خبرن جي اشاعت انتهائي ضروري آهي، ته جيئن سماج ۾ انتشار بدران آگاهي ۽ هم آهنگي کي فروغ ملي سگهي.اجلاس جي پڇاڙيءَ ۾ شرڪت ڪندڙن قومي پاليسي 2024 تي اثرائتي عملدرآمد، امن امان جي قيام ۽ سماجي هم آهنگي جي فروغ لاءِ گڏيل تعاون ۽ ڪوششن کي جاري رکڻ جو عزم ظاهر ڪيو.