سکر ۾ هٿياربندن جي فائرنگ ۾ چاچو ڀائٽيو قتل, ڊاڪٽر نه هجڻ سبب لاش 4 ڪلاڪن تائين اسپتال ۾ پيل رهيا

هٿياربندن جي فائرنگ جي نتيجي ۾ سليم ٿڏي تي قتل ٿي ويو، ثناءُ الله کوسو اسپتال ۾ زخمن جا سور نه سهندي دم ڏنو

سکر (بيورو) سکر ۾ هٿياربندن جي فائرنگ، ٻه ڄڻا قتل، شاهه فيصل ڪالوني جي رهواسي سليم کوسو، ثناء اللہ کوسو مٿان سبزي منڊي ويجهو موٽر سائيڪل سوار هٿياربندن فائرنگ ڪئي، فائرنگ جي نتيجي ۾ ٻئي ڄڻا قتل ٿي ويا. مقتولن جا لاش پوسٽ مارٿم لاءِ اسپتال پهچايو ويا جتي مقتولن جا وارث توڙي کوسا برادري جا ماڻهو وڏي انگ ۾ پهچي ويا. وارثن موجب ٻئي چاچو ڀائٽيو اسٽينڊ تي واقع دوڪان تي معمول مطابق روزگار لاء وڃي رهيا هئا. سبزي منڊي ويجهو تاڙ ۾ ويٺل موٽر سائيڪل سوار هٿياربندن ٻنهي ڄڻن مٿان فائرنگ ڪئي. اسپتال ۾ ڊاڪٽر نه هجڻ سبب لاش چئن ڪلاڪن تائين اسپتال ۾ پيل رهيا. مسلسل ڪالز توڙي ميڊيا ۾ خبر هلڻ بعد پوسٽ مارٽم ڪندڙ ڊاڪٽر اسپتال پهتو. قتل وقت پوليس به واقعي واري هنڌ دير سان پهتي هئي. پوسٽ مارٽم بعد لاش شاهه فيصل ڪالوني آندو ويو. هڪ ئي وقت ٻه لاش پهچڻ تي گهر توڙي پاڙي ۾ سوڳ وارو ماحول ڇانيل رهيو. صبح جو معمول مطابق چاچو ڀائٽيو سليم کوسو ۽ ثناء اللہ کوسو بس اسٽينڊ وٽ واقع دوڪان تي وڃي رهيا هئا ته موٽر سائيڪل سوار هٿياربندن فائرنگ ڪئي.فائرنگ ۾ سليم ٿڏي تي قتل ٿي ويو. جڏهن ته ثناء اللہ اسپتال ۾ زخمن جا تاب نه سهندي فوت ٿي ويو.وارثن جو چوڻ آهي اسان جي ڪنهن سان دشمني ناهي. پوليس موجب معاملي جي گهڻ رخي جاچ ڪري جلد اصل حقيقتون سامهون آڻڻ سان گڏ قاتلن کي گرفتار ڪري قانون جي ڪٽهڙي ۾ آندو ويندو.